Dul-an sa walo ka tuig human sila napahawa sa dapit nga gipuy-an tungod sa super typhoon Yolanda (Haiyan), kapin sa 100 ka mga pamilya sa lungsod sa Tudela, Cebu nahatagan og katungod nga makapuyo sa bag-ong mga panimalay.
Ang National Housing Authority (NHS)-Central Visayas niadtong Biyernes, Nobiyembre 5, 2021, nag groundbreaking alang sa pagtukod sa 158 ka housing units nga ihatag sa mga pamilya sa Our Lady of Immaculate Conception Homes sa Sitio Kanlipot, Barangay Calmante.
Mao usab kini ang okasyon sa raffle ug awarding sa mga housing units nga gipangulohan ni Tudela Mayor Greman Solante ug NHA Regional Manager Hermes Jude Juntilo.
Ang NHA-Central Visayas nipahibawo nga ang mga paningkamot sa Inter-Agency Task Force-Yolanda nga gipangulohan ni Secretary Karlo Nograles ug ang Office of the Presidential Assistant for the Visayas nga gipangulohan ni Secretary Michael Lloyd Dino nakatabang sa pagduso sa proyekto.
Makompleto sa Steadfast Builders Corp. ug Prime Giga Builders Construction Corp. ang housing units sa unang bahin sa 2022.
Gawas sa pagtukod sa mga balay pinaagi sa local government unit, ang NHA mohatag og livelihood training, ingon man gender and development programs, aron mapalambo ang socio-economic status sa umaabot nga mga benepisyaryo sa mga panimalay.
Ang Tudela nalakip sa 15 ka lungsod sa amihanang Sugbo nga gikusokuso sa bagyong Yolanda niadtong Nob. 8, 2013.