GIKUSTODIYA na sa Malalag Municipal Police Station ang drayber sa tanker truck nga midaro sa usa ka traysikel nga gikamatay sa drayber niini.
Ang insidente nahitabo alas 8 sa buntag niadtong Sabado didto sa Sitio Tawal, Purok 4, Barangay Tagansule, Malalag, Davao del Sur.
Giila ang biktima nga si Rene Regodos Cabusas, construction worker, 54, kinsa padung na unta sa iyang trabahoan niadtong mga oras.
Sa pasiunang imbestigasyon nasayran nga samtang nagmaneho si Cabusas sa iyang "bukakang" usa ka traysikel kargahanan og hayop, pasaka sa Sitio Baluyan, Barangay Bolton sa Malalag, sa dihang gibanggaan siya sa usa ka fuel tanker nga STX Cargo Petroleum Truck.
Dugang nasayran nga gikan sa General Santos City ang tanker paingon sa Digos City nga gimaneho ni Robert Matilos, 46.
Sumala sa drayber sa tanker, kalit na lang nga wa migana ang brake sa truck hinungdan nga nawad-an kini og kontrol nga mibangga sa traysikel.