MOABOT sa P500,000 ang balor sa sobra sa usa ka gatos ka mga dagkong kaang sa mga bonsai sa endangered plants ang naimbargo sa mga personnel sa Protected Areas and Special Concern Division sa Department of Environment and Natural Resources (DENR) 7.
Si Undersecretary Edilberto Leonardo sa nahisgutang dibisyon maoy nangunay sa operasyon sa pag-imbargo sa endangered plants sa pipila ka mga residente sa Barangay Babag 1, dakbayan sa Lapu-Lapu niadtong Biyernes, Nobiyembre 5.
Kuyog usab sa gihimong pagpang-imbargo sa maong mga tanom ang mga operatiba sa Police Drug Enforcement Group (PDEG) Visayas Special Operations Unit (SOU-7) pinangulohan ni Police Brigader General Reymus Medina, director sa PDEG ug barangay officials sa Barangay Babag 1.
Si Leonardo nagkanayon nga ang mga tanom nga ilang gipangsakmit tungod kay nihit na kaayo makita daplin sa kabaybayonan kining mga tanoma nga maoy dunay dakong tabang sa paghimo sa mga beach forest.
Sa duha ka mga operasyon nga gilusad sa DENR ug PNP niadtong Biyernes sa buntag paingon na sa hapon, gibanabana ni Leonardo nga moabot sa tunga sa milyon ka pesos ang balor sa endangered plants ang ilang nasakmit.
“Sa online kasi to eh na-monitor namin sa online yong bintahan. Ang lalaki nang halaga nang bintahan sa online,” matod ni Leonardo.
Dugang niya nga pinaagi sa ilang pag-order sa online, natumbok nila ang lugar kon asa naggikan kining mga tanoma.
Makurat ang maong grupo sa ilang nadiskobrehan nga ubay-ubay ka mga residente sa Barangay Babag 1 ang ilang nasaksihan mismo nga nagtanom sa maong matang sa mga tanom hinungdan nga ila na kining gipang-imbargo gikan sa mga nanag-iya niini.
Gipasabot sa opisyal nga ila kining gibuhat ang pagpangsakmit sa maong klase sa mga tanom tungod kay hapit na nangahurot. Kon dili hatagan og pagtagad, peligrong mahurot tanan.
Dili moubos sa P20,000 mil pataas ang matag kaang sa endangered plant ang baligya ngadto na sa mga pumapalit.
Gihulagway ni Leonardo nga nindot makaangkon sa maong klase sa mga tanom tungod kay gawas sa mahal kon paliton, nindot usab nga tan-awon sa mga tawo kon ibutang gawas sa panimay isip dekorasyon.
Ang DENR mosusi usab sa mga naimbargohanog og endangered plants kon duna ba silay tulubagon sa ilang pananom. Kini maoy usa sa ilang imbestigahan pa.
Samtang si Marissa Inihao sa Babag 1, usa sa mga naimbargohan og endangered plants, nipasabot nga wala kini kasayuran sa maong mga tanom nga kabahin na diay kadto sa mga gidili nga itanom.
Dugang ni Marissa, ang iyang bana gyud ang nananom sa maong mga tanom hinungdan nga sa iyang pagkahibalo nga gidili diay tungod sa iyang kahadlok walay daghang langan si Marissa sa paghatag sa mga tanom ngadto na sa mga tinugyanan.
Nakugang usab si Marissa nga sa pagkahibalo nga perti man diay kaayong mahala sa maong matang sa mga tanom sa presyo niini sa online market.(BBT, AYB)