MAGAMIT alang sa Day Care Center ug Livelihood Training Center ang bag-ong natapos nga tulo ka andana nga Multipurpose Building nga nahimutang sa Purok Judas Belt, Barangay Babag, Lapu-Lapu City.
Ang Department of Public Works and Highways (DPWH) ug si Kongresista Paz Radaza opisyal nga mi-turnover nga gidunganan sa blessing sa maong estraktura nga adunay kinatibuk-ang kantidad nga P9.7 milyunes.
Gitug-an ni Babag Barangay Kapitan Arsenio Berdin nga ang ilang Day Care Center nagkabuwag-buwag nga gidumala sa tulo ka mga magtutudlo.
Adunay nagtudlo sa Purok Bombshell, adunay nagtudlo sa may simbahan sa Babag ug laing maestro ang homebased, diin niabag ang barangay sa ilang panginahanglan aron nga makapadayon sa pagtudlo sa mga bata.
Sa ikaduhang andana, mahimutang ang livelihood training center kansang training program naglangkob sa dressmaking, cooking ug ubang skills training program.
Nasayran nga niadtong Pebrero 2021 gisugdan og tukod ang maong multipurpose building ug natapos niadtong Hulyo 2021, bisan nga ang contract expiry sa Agusto 2021.
Samtang si Kongresista Radaza midugang nga gawas sa maong edipisyo, gihimo sab ang drainage project, road asphalting nga adunay stud lights sa maong barangay ug pagbutang og mga solar lights nga adunay budget nga P75 milyones.
Gawas pa, mitagana ang buhatan ni Radaza og P8 milyones alang sa pagpakompleto og human sa barangay hall sa Babag nga hangtod karon padayon pang gitrabaho.