ANG lungsod sa Cordova nimando sa pagsira sa floating cottage tungod sa daghang kalapasan sa national laws ug local ordinances sa lungsod.
Sa Facebook post, ang lokal nga kagamhanan niluwat og order of closure sa business ug cease and desist operation sa BoraBora Floating Cottage niadtong Huwebes, Nobiyembre 4, 2021.
Sumala sa imbestigasyon nga gihimo sa hepe sa Cordova, Police Captain Ramil Dugan, niadtong Nobiyembre 2, 2021, nasuta nga daghang estraktura nga gitukod sa dapit.
Mao kini ang nag-aghat kang Cordova Mayor Therese Sitoy-Cho sa pagsusi sa awtoridad sa dapit.
Base sa post sa Cordova, ang floating cottage nakalapas sa Article XII, Section 2 of the 1987 Philippine Constitution which stated, “all waters and fisheries of the Philippines are owned by the State.”
Dugang pa walay business permit gikan sa Business Processing and Licensing Office sa Municipality of Cordova; pagtukod og building nga walay building permit gikan sa Office of the Building Official; kakuwang sa sanitary permit gikan sa Rural Health Office; ug kapakyas sa pagsumiter sa ubang dokumento sama sa Real Property Tax receipts, ug Occupancy Permit.
Ang team nipatuman sa closure sa BoraBora Cordova naglakip sa Business Processing and Licensing Office, Marine Watch, Engineering Office, Disaster Risk Reduction and Management Office, ug Philippine National Police-Cordova.
Ang Superbalita Cebu naningkamot sa pagkontak sa tagdumala sa BoraBora apan napakyas. Apan, andam ning mantalaan sa pagpatik usab sa ilang habig kon makontak kini. (RRM, JOB)