GIBUTYAG sa banay ni Cebu City Mayor Edgardo Labella nga naospital na sab ang mayor tungod sa pneumonia. Nagsugod ang iyang indefinite leave niadtong Oktubre 8. Mi-file siya og leave of absence gikan sa Septiyembre 20 hangtod sa Oktubre 7.
Apan bisan pa sa iyang gisagubang nga suliran sa panglawas, ang mayor di mo-resign sa iyang puwesto kay daghan pa siyag buhaton inig balik niya sa City Hall, matod pa sa usa sa iyang mga anak.
Tingali, gawas sa iyang oath of office, nakapanumpa si Mayor Labella nga di niya biyaan ang iyang puwesto “in sickness and in health.”
Way angay kabalak-an si Mayor Labella kay samtang wa pa siya sa City Hall, anaa man si Acting Mayor Mike Rama nga kaduha napili nga city mayor ug nag-alagad gikan sa 2010 hangtod sa 2016.
Ug matod pa ni Director Ian Kenneth Lucero sa Department of the Interior and Local Government (DILG) Cebu City, si Rama sama na sa usa ka pinili nga mayor kay nilapas na ang 30 ka working days gikan sa pag-file ni Labella og medical leave.
Di mapasagdan ang siyudad kay hingpit na ang iyang gahom isip acting mayor, lakip sa pag-appoint, pagsuspenso ug pag-dismiss sa mga kawani sa siyudad.
Apan mipasidaan si Rama. Di siya gusto nga dunay modiktar kaniya kon unsaon niya pagdumala ang City Hall. “Don’t teach me how to run City Hall,” matod pa niya.
Sus, kinsa man sang maayong lakiha ang motudlo sa acting mayor nga nag-alagad na isip mayor sa duha ka termino?
Matod ni Rama, duna na diay nanawag niya nga ipatangtang ang pipila ka mga staff sa City Hall.
Matod ni Rama, bisan pa kon duna na siyay gahom sa usa ka pinili nga mayor, wa mosantop sa iyang hunahuna nga mayor na siya. Alang kaniya napili siya nga bise mayor ug ang iyang termino hangtod sa Hunyo 30, 2022.
Sa samang higayon, ang termino ni Mayor Labella hangtod sa Hunyo 30, 2022. Di niya gustong tuya-tuyaon ang sakayan, matod pa niya.
Delikado gyud nga tuya-tuyaon ang sakayan. Nakahibawo na mo kon unsay sagad nga mahitabo ug sangpotanan.