HUMAN madasmagi sa usa ka motorsiklo, naligsan pa sa nagsunod nga bus ang usa ka 56 anyos nga lalake sa alas 6:10 sa gabii sa Dominggo, Nobiyembre 7, 2021 sa Barangay Puente, Lungsod sa Carmen, Amihanang Sugbo.
Patay nang nadangat sa Cebu Provincial Hospital sa Dakbayan sa Danao si Anecito Cañete, taga Barangay Panalipan sa nahisgutang lungsod.
Matod sa kapulisan sa Carmen nga kalit nga nilabang sa karsada si Cañete dihang naigo sa motorsiklo.
Ang drayber, inay motabang, nipasutoy sa pagpadagan padung sa norte.
Ang nagsunod nga pasaheroang bus nakaligis kang Cañete, kinsa daling gidala sa tambalanan, apan patay nang niabot.
Ang drayber sa bus nga si John Michael Capuyan, 30, taga Hagnaya, Carmen gitanggong sa Carmen police samtang nagpaabot kon mopasaka ba og kaso ang pamilya ni Cañete. (GPL)