HUMAN na ang hataas nga bakasyon dala sa adlaw sa mga santos. Balik-eskuwela na sab ang mga bata, bisan tuod wala nay "face-to-face classes."

Human sa hapit nga duha ka tuig nga walay klase, mora'g naka-adjust na ang kabataan sa "new normal." Hasta sab ang katawhan daw nahimong naandan na nga magtaklob sa ilong ug pagmaskara kung mogawas sa ilang pinuy-anan.

Daghang nalipay sa bag-ong kasugoan nga luagan na ang pagdili sa paggawas tungod sa Covid. Gitangtang sab ang plastik nga babag sa lingkuranan samtang di na kinahanglan ang "face shield" gawas kung magtapok sa sirado nga dapit.

Di na pud kaayo kulba ang sitwasiyon sa nagkasakit kay ingon pa sa eksperto sa surbey nga ubos na sa 1% ang pagkuyanap sa maong sakit tungod sa bakuna. Gani, niubos na sa 40-50% ang katre sa ICU sa hospital nga gihigdaan sa masakiton. Ang wa pa lang mahuwasi karon sa kakulba mao ang mga supporters ni Mayor Inday Sara.

Sila tong taga Mayor Sara Duterte Alliance (Masada), Inday Sara Duterte Advocates (ISDA), Sara Na All Philippines 2022 ug 700 pa ka grupo sa tibuok nasud.

Sa pagkatinuod, daghan kanila ang nawad-an og paglaum nga modagan pa pagka-presidente si Mayor Sara sa dihang nilapas na ang Oktubre 8 nga maoy deadline sa "filing of certificate of candidacy."

Ang uban nagpaupaw na gani isip pagpasibaw nga nasagmuyo sila nga dili modagan ang ilang idolo nga anak ni Presidente Rody Duterte. Ang uban niambak sa laing kampo aron dili daw mabiyaan sa tren sa panahon sa kampanya.

Kahibalo baya kita nga moawas ang sapi sa panahon sa eleksiyon. Ang uban naghulat niining panahona aron makabalos kuno sa mga kandidato nga naggamit lamang kanila.

Apan ang kadaghanan nagpabilin nga naghandom nga modagan gayud si Mayor Sara pinaagi sa "substitution" karong Nobyembre 15.

Subay sa huyop sa hangin nga akong nasimhot nga modagan gayud si Mayor Sara pagka-pangulo. Siya kadtong gitawag nga berdeng Agila sa Mindanao nga motugpa sa ganghaan sa buhatan sa Comelec sa Manila aron mo-file sa iyang "certificate of candidacy" isip hulip sa usa sa mga nidagan pagka-presidente sa nasud.

Dunay huhungihong nga adunay tukuron nga dakong coalition karong semahana tali sa partido sa mayora ug sa usa ka nasudnong partido nga mao unyay iyang sakyan ug mahimong makinarya sa iyang kampanya.

Kung walay kabilinggan, madayon gayud ang paglupad sa berdeng Agila una moabot ang Nobyembre 15 ug mahanaw na unya ang kulba sa mga "parallel groups" nga nisuporta sa iyang kandidatora. Kulbahinam gayud tuod kining sunod semana nga moabot kay dinhi atong masuta kung mopadayon ba ang legasiya sa mga Duterte o katapusan na kini sa ilang politikanhong kinabuhi?

Bisan tuod nga seguradong modaug si Mayor Sara pagka-mayor sa Davao, kauban ang iyang Manoy Pulong pagka-kongresista sa unang Distrito, ug ang iyang manghod nga si Baste pagkabise-mayor, wala nay higayon ang usa ka Duterte nga mamahimong pangulo sa kasaysayan sa nasud. Maila na unya si Mayor Sara sa atong kasaysayan nga mayor nga diriyot mahimong presidente.