DAKO ang pasamalamat sa Philippine Drug Enforcement Agency (PDEA)-Davao Region sa nagpakabana nga katawhan ug sa mga kasaligan nga impormante nga maoy hinungdan sa ilang mga dagko nga kalampusan diha sa ilang operasyon.
Kini ang gibutyag ni PDEA-Davao spokesperson Noli Dimaandal human sa malampusong buy-bust operation niadtong Sabado, Nobyembre 6, 2021, didto sa Barangay Pindasan, Mabini, Davao de Oro.
Sumala sa opisyal nga mokabat sa P1.5 milyon nga kantidad sa shabu ug party drugs ang ilang nasakmit gikan sa grupo sa maghigala nga anaa sa usa ka beach resort sa dapit.
Gawas sa target, anaa sa buy-bust ang lain pang upat ka mga indibiduwal ug naaktuhan sab nga nag-pot session atol sa ilang party ang laing 12 ka mga indibiduwal.
Mga dinakpan halos taga Davao City nga midayo sa usa ka beach resort sa Pindasan alang sa ilang beach party.
Kauban sa Philippine Drug Enforcement Unit-Davao ang National Bureau of Investigation Semro ug Mabini Municipal Police Station.
Giila ni PDEA-Davao Director Aileen Lovitos ang target sa drug-bust operation nga usa ka 33-anyos nga taga Catalunan Pequeño, Davao City, ug laing upat ka mga kaubanan niini.
Ang suspek napalitan og usa ka pakite nga dunay unod nga color violet capsule nga gituohang party drug kantidad og P2,000 ug usa ka plastic dunay unod nga pinaugang dahon sa marijuana mokantidad og P6,000.
Nadakpan sab ang lain pang 12 ka mga kaubanan sa suspek nga nag-pot session.
Narekober sa mga awtoridad ang 26 ka mga pakite nga dunay unod sa pinaugang dahon sa marijuana, nga motimbang sa 200 gramos dunay kantidad nga P24,000.
Laing narekober ang tulo ka mga pakite sa gituohang shabu, motimbang sa 10 gramos nga dunay kantidad nga P150,000.
Moihap sab sa 722 nga party drug tablets/capsules nga mokantidad og P1,227,400.
Siyam ka mga plastic bottles nga dunay unod ang gituohang liquid party kantidad og P15,000.
Duha ka vials sa gituohang liquid party drugs kantidad og P17,000.
Anaa sab sa 77 ka mga gituohang LSD kantidad og P130,000 ug 7 ka botelya sa energy drinks.
Mga suspek gikustodiya na karon sa NBI detention facility.