LUYO sa hinay-hinay nga pag-ubos sa kaso sa Covid-19 sa Davao City, usa sa mga ginatun-an karon sa City Economic Enterprise mao ang pagbalik sa operasyon sa Roxas Night market.
Atol sa Special Hour ni Davao City Mayor Sara Duterte sa Davao City Disaster Radio (DcDR) kagahapon, gibutyag niini nga kasamtangang ginatun-an karon sa City Economic Enterprise ang pag-abli og balik sa Roxas Night Market sanglit daghan na ang naghinam-hinam nga subli kining maablihan.
Kini human sa taas-taas sab nga panahon nga temporaryo kining nahunong gumikan sa mga hugot nga quarantine classifications sa mga nakalabay nga bulan sa siyudad.
Ang Roxas Night Market usa sa mga sikat ug ginadayo, dunay mga kan-anan, mga tinda sa ukay-ukay ug uban pa.
Hinuon, ipasalig sa lokal nga kagamhanan ning dakbayan nga kung subli kining ablihan sa di madugay, magpabilin gihapon ang hugot nga pagpatuman sa mga guidelines ilabi na sa mga health protocols.
Hinay-hinay nang giablihan ang ekonomiya sa Davao City human kining gipaubos sa Alert Level 3 diin una nang giwagtang ang paggamit og face shield ug gipangwagtang na ang mga barriers sud sa mga public utility vehicles.
Hinuon, wa pa gibutyag si Duterte-Carpio kung kanus-a kini subling ablihan ngadto sa publiko.