ANG Cebu Police Provincial Office (CPPOP) nisaulog sa 120TH Police Service Anniversary diin gihatagan og pasidungog ang police stations ug mga personnel nga angayan nga hatagan og award tungod sa ilang performance.
Ang Bogo City Police Station napili nga Best City Police Station sa Unit Performance Evaluation Rating. Gisundan kini sa Liloan Police Station isip Best Class A and B Municipal Police Station.
Ang Compostela Police Station maoy Best Class C Municipal Police Station ug ang 2nd Provincial Mobile Force Company isip Best Mobile Force Company sa probinsya sa Sugbo.
Ang Talisay City Police Station maoy Best City Police Station isip Top Performing police stations alang sa PNP flagship program.
Gitunolan usab og pasidungog si Talisay City Mayor Gerald Anthony "Samsam" Gullas nunot sa gihatag nga suporta ngadto sa kapulisan sa iyang dakbayan ilabi na sa kampanya batok sa krimen ug illegal nga drugas.
Nakadayeg ang ika upat nga labing taas nga opisyal sa Camp Crame, Police Lieutenant General Dionardo Carlos, Chief of Directorial Staff sa PNP, nga guest speaker tungod sa kalimpyo sa kampo sa CPPO ug sa gipakita nga performance sa matag police station sa lalawigan sa Sugbo.
“You have two of the outstanding Filipinos this year. Si Master Sergeant Ylanan at si Police Lieutenant Colonel Gerard Pelare. So biro mo tatlo lang yang police na awardan ng Metrobank Foundation dalawa nasa Cebu province...” matod ni Carlos.
Sa iyang mensahe, gidasig niya ang kapulisan sa probinsya nga palambuon pa nila ang police community relations sanglit kini maoy sekreto sa pagkunhod sa krimen sa usa ka siyudad ug lungsod.
Si Police Colonel Engelbert Soriano, hepe sa CPPO, nagkanayon nga ang gibasehan sa pasidungog mao ang performance sa kampanya batok drugas ug kriminalidad.
Matod niya nga sa nanglabay nga mga buwan sub-sub ang operasyon batok marijuana plantation sa probinsya diin minilyon ka pesos ang ilang nasakmit.
Dako og natampo sa pagkunhod sa krimen ang war on drugs human wala nay mga notadong durugista sa kabarangayan ug luwas na ang mga lumolupyo sa maong lugar.
Iyang gihulagway nga kon kaniadto ang dakbayan sa Talisay maoy hot bed sa illegal nga drugas, apan tungod sa kampanya sa kapulisan sa maong siyudad ug sa pag-abag ni Mayor Gullas, nakuhaan ang problema sa illegal nga drugas sa maong dapit.
Nisunod usab ang component cities sama sa Naga, Danao, Bogo ug Toledo nga taas usab ang ilang performance batok kriminalidad ug illegal nga drugas.
“Talisay City, kino-consider yan na hot bed, but with the efforts of our chief of police and the honorable mayor, yung kanilang holistic approach to anti-illegal drugs," matod ni Soriano.
Gidasig ni Soriano ang iyang mga personnel nga palambuon ang performance ilabi na nga nagkaduol ang Pasko ug gitan-aw nga mosaka ang demand sa illegal nga drugas sa maong mga panahon.