SA pagseguro sa igong supply sa kuryente sa isla sa Bantayan, nitugot ang Energy Regulatory Commission (ERC) sa pag-source out og power supplier.
Subay sa giluwatan nga Notice of Resolution sa ERC, gipahibaw niini nga usa ka tigum ang gihimo sa Nobiyembre 4, 2021 aron hisgutan ang hangyo kalabot sa Power Supply Agreement (PSA).
Apan gipasabot sa ERC nga sa kasamtangan dili pa kini maka-issue og PSA tungod sa legal issues nga tukion pa.
Aron dili madelatar ang paghatag og supply sa kuryente sa isla, gitugotan hinuon niini ang Bantayan Island Electric Cooperative, Inc. (BANELCO) nga mo-pili og laing power supplier nga maka supply og kuryente sulod sa 90 ka adlaw o tulo ka buwan.
Sa uwahing taho sa Banelco, gipahibalo niini nga ang Isla Norte Energy Corporation (INEC) mao na ang nag-supply sa power requirement sa isla sa Bantayan.
Una na sab nipadayag ang mga opisyal sa INEC nga naka kompleto na sila sa tanan nga mga dokumento nga gipangayo lakip na niini ang testing ug commissioning.
Sa sayo pa, usa ka tigum ang gipahigayon ni Cebu Governor Gwendolyn Garcia tali sa ERC, INEC, Bantayan Electric Cooperative (Banelco), Bantayan Island Power Corp.
(BIPCOR), ug mga mayor sa Santa Fe ug lungsod sa Madridejos sa Oktubre 2021 aron hangyuon ang ERC aron masolusyonan ang taas nga brownouts sa isla.
Karong semanaha, gikatakda usab ang inauguration sa power plant sa INEC sa isla sa Bantayan.