GIKAN sa pagtambal ngadto sa ilang mga pasyente ngadto sa paglipay sa ilang kaubanang frontliners.
Mao kini ang gibuhat sa Frontliner Treats, usa ka grupo sa mga doktor ug usa ka fashion designer, ngadto sa frontliners sa University of Cebu Medical Center (UCMed) ug St. Vincent General Hospital sa Nobiyembre 5, 2021.
Ang Frontliner Treats usa ka gamay nga grupo sa mga tawo nga nagpasiugda og donation drives ug libreng pahalipay, sama sa mga pagkaon, ngadto sa medical ug non-medical frontliners.
Ang Frontliner Treats naninguha og maayo aron paghimo sa ilang kaubanang frontliners nga malipayon taliwa sa coronavirus pandemic.
Kapin sa 1,000 ka medical ug non-medical staff sa UCMed ug SVGH gihatagan og mga pagkaon ug goodies sa mga doktor.
Ang mga doktor giubanan sa 12 ka mga kandidata sa Miss Cebu 2022 atol sa pagpang-apod sa goodies isip kabahin sa ilang community outreach.
Si Cinbeth Orellano, Cebu City Tourism Commissioner, niingon nga ang Miss Cebu 2022 candidates gi-immerse sa nagkadaiyang mga sektor, lakip na sa health ug service.(REV gikan sa PR)