USA ko sa mga tawo nga mahiligon kaayo magmotor. Sa akong hilig, tulo na ka motor ang akong napalit ug nagamit sa pagsuroy sa lainlaing mga dapit sa Cebu ug silingan nga mga isla sud na sa lima ka tuig. Nakapag sab ko og daghang mga higala nga sama nako hilig og ride.
Apan usahay maglagot ko maghuna-huna ug magtan-aw og mga checkpoint sa mga pulis ug Land Transportation Office (LTO) ug uban pang traffic bodies kay ang ila rang parahon ang mga nagsakay og two-wheel nga sakyanan. Feel nako nga kaming nagsakay og motorsiklo puro suspetsadong mga kriminal. Pangitaan og lisensya, registration sa sakyanan ug kon ting-curfew, pangitaan pa mi og certificate of employment (COE).
Kinsa bay di maglagot nga mangagi ra man ang four-wheeled nga mga sakyanan, igo rang magtan-aw namong galinya intawon daplin sa dalan, nagpunsisok kay gitan-aw ang among papers.
Ma-feel nako nga dunay diskriminasyon ang kagamhanan kada dunay checkpoint kay nganong ang mga naka two-wheel og mga sakyanan mao ra may parahon? Kanang kami ra sang mga naggamit og gagmay nga motor. Ang mga tig big bike nga mga rich di man maigo sa checkpoint. Maayo lang kon matsambahan sa LTO but panagsa ra sab kaayo.
Atong klaruhon nga kadaghanan sa mga nagmotor di intawon mga criminal. Kadaghanan namo nagmotor aron mas makadaginot sa pamplete kay grabeha na ka mahal sa plete karon. Mas makadaginot sa lagyo nga mga biyahe ug dali nga maabot, gikan sa point A to B. Apan nganong ingon ani man ang pagtratar sa kagamhanan namo, labina sa kapulisan?
Tan-awa ra gud, ang dagko ug daghang drugs nakuha gikan sa mga tawo nga nagsakay og four-wheels, wa sa mga nagmotor. Ang mga bigtime drug pusher nag-awto o nag four-wheel drive, ang uban SUV, kay di man parahon sa mga awtoridad, pasagdan ra man kay gatuong rich kids ang sagakay, but mga criminal diay.
Di ba, sa nangaging mga anti drug operation wa maggamit og motor ang mga durugista kay kahibawo man silang parahon kon dunay checkpoint.
Di tungod kay ang mga gun-for-hire kasagaran nagmotor, kami na lang ang pirme initan. Di ba diay pwede nga parahon pud ang mga nag four-wheel aron magpanagana ning mga kriminal nga nag SUV, tahor kaayong tan-awon pero mga durugista diay.
Gawas ani, di sab tanan nagmaneho og four wheels nga dunay tarong nga lisensya. Naay uban ana nila, expired na, sama adtong nagmaneho og van sa banko nga nasakpan nga expired og lisensya human dakpa sa Talisay traffic enforcers kay nakalapas sa balaud sa trapiko.
Timan-an unta sa mga pulis ug mga awtoridad, kaming mga nagmotor di mga kriminal.