(UPDATED) Duha ka pasahero sa usa ka nalunod nga motorbanca sa may Hilutongan Channel habig sa lungsod sa Cordova ang padayong gipangita sa mga sakop sa Philippine Coast Guard (PCG) Cebu ug Lapu-Lapu City Disaster Risk Reduction and Management Office (CDRRMO) Martes, Nobiyembre 9, 2021.
Gipahibaw ni Nagiel Bañacia, hepe sa CDRRMO Lapu-Lapu nga sa alas 9:00 sa Martes buntag, duha pa ang ilang padayon nga gi-pangita sukad sa pagkaunlod sa motorbanca Lunes sa gabii.
Subay sa pasiunang pakisusi sa Coastguard, nibiya sa Olango island ang motorbanca sa alas 9:00 ngadto na sa alas 10:00 Lunes gabii, Nob. 8, 2021, paingon na unta mopauli sa dakbayan sa Lapu-Lapu.
Giingong nakasugat og dagkong bawod ang motorbanca hinungdan sa pagkaunlod niini.
Ang barko nga 'Seaborne Cargo 5' paingon unta sa Tagbilaran Port sa Bohol maoy niluwas sa mga pasahero.
Matud pa ni Bañacia nga anaa sa Bohol ang walo nga na-rescue, usa ang anaa sa Barangay Punta Enganio.
Na identify na usab ang usa sa mga biktima nga si Arniel Balingkit taga Sitio Abuno, Barangay Pajac, dakbayan sa Lapu-Lapu.
Matod ni Bañacia nga gikan nitambong og birthday celebration ang mga biktima ug giingong nabuslot ang ilang motorbanca hinungdan sa pagkaunlod niini. (ANV)