SUKAD sa pag-ubos sa alert level kabahin sa pandemya sa Covid-19 dinhi sa atong probinsya sa Sugbo ingon man sa mga dakbayan ug kalungsoran diin gitugtan na ang mga bata nga makasuroy inubanan sa ilang ginikanan o magbalantay, mora og dunay pista kay bisan asa nga dapit daghan na ang mga tawo nga magtapok.
Nakapabor karon ang mga tindahan ug mga resort kay maoy padulngan sa kadaghanan mga tawo nga morag mao pay paggawas sa ilang balay sukad sa miaging tuig tungod sa Covid-19. Ang mga depasaheroan, PUJ ug Bus, pirmi na nga puno bisan og wala pa mohatag og pagtugot ang IATF nga siyento porsento na ang kapasidad sa mga depasaheroan ug sa pagtangtang sa mga tabil niini.
Niadtong Dominggo, ang mga PUJ nga akong nasugatan wala nay tabil o kurtina nga cellophane sa sulod nga magbahig sa mga pasahero nga nagprotehir sa posible nga takod sa Covid-19. Ang kadaghanan sa mga nanakay wala na usab mosul-ob sa face shield. Nagsul-ob pa hinuon sila og facemask apan ang uban ang suwang maoy gitaoran. Bisan tuod og miubos na ang numero sa mga natakdan ug namatay sa Covid-19 sa miaging mga adlaw, apan nia pa gihapon kining makamatay nga virus.
Gani, ang abiso sa DOH ug IATF nga pirmi lang gihapon nga magsul-ob og facemask kon naa sa dapit nga daghan og tawo sama sa opisina, tiyangge, mall ug restaurant. Ang mga restaurant wa pa gitugtan sa syento porsent nga kapasidad sa ilang customer.
Mao ni nakaapan sa kadaghanan nato kay paspas mobuhat sa gidili apan magmakuli og tuman sa minimum health protocols sama sa social distancing, husto nga pagsul-ob sa facemask ug pirmi nga panghugas ug pagsabon sa kamot o di ba haplas sa alcohol. Kanang nagbahig nga plastic nga tabil sa mga pasahero sa PUJ kon wa ko masayop gi-studyohan pa na sa IATF kon angayan na ba tangtangon apan gitangtang na dayon sa mga tag-iya sa mga depasaheroan.
Gi-estudyohan pa usab sa IATF kon angayan ba nga di na mosul-ob og face shield gawas sa mga nagtrabaho sa hospital. Apan tan-awa, daghan na kaayo ang di na mosul-ob sa face shield. Kadaghanan isul-ob lang ang face shield sa entrance sa mga mall aron makasulod apan ig-abot sa sulod naa na sa ilang ulo ibutang ang face shield samtang ang uban bitbiton lang.
Di man ko pisimista, apan sa akong tan-aw ighoman aning buwan sa Disyembre kon ang kadaghanan kanato mokumpiyansa na dunay posibilidad nga mosaka na usab ang kaso sa Covid-19. Mao man ni ang nahitabo sa miaging tuig. Miubos ang kaso sa Covid-19 sa buwan sa Novembre ug Decembre apan pagsugod sa buwan sa Enero hantud sa buwan sa Marso misaka ang kaso sa takod sa virus.
Di na angayan nga pahimangnoan ta sa pagtoman sa minimum protocols kay ato man nasinati sa miagi nga tuig, nga ighoman sa mga kalihokan nga magpundok ang mga tawo mosaka ang kaso sa Covid-19.