COTABATO CITY -- Patay ang usa ka mag-uuma human gidunggab sa iyang ig-agaw human maalai nga aswang alas 9:15 sa gabii niadtong Dominggo, Nobyembre 7, didto sa South Upi, Maguindanao Province.
Ang napatay giila nga si Jesus Alvez, 44, minyo, samtang ang suspek mao si Nognog Alvez, pulos molupyo Barangay Romanggaob, South Upi.
Sa taho gikan sa South Upi Municipal Police Station, nasayran nga kuyog nga nag-inom og makahubog nga ilimnon ang mag-agaw ug dungan sab nga nanguli sa ilang tagsa-tagsa ka mga balay.
Apan alas 7:25 sa buntag niadtong Lunes, Nobyembre 8, nakaplagan na lang ang patay nga lawas ni Jesus sa kasagbutan nga bahin nga nahiagom og daghang mga samad dinunggaban.
Sa pag-imbestiga sa suspek sa kapulisan, gisaysay niini nga sa dihang nanguli sila ni Jesus sa ilang mga balay, kalit matud pa silang gisakdapan og aswang, hinungdan nga iya kining gidabu-dabuhan sa pagdunggab.
Ang hitabo diay kay bunga lang sa sobrang kahubog sa mag-agaw, hinungdan nga naalan sa suspek ang biktima nga aswang ug gidunggab sa makadaghang higayon.
Mahayag sab ang mga silingan sa duruha nga sa wala pa sila manguli niadtong higayona, nagkalalis diay kini ug diriyot nga magsinumbagay.
Balhog na ang suspek sa selda sa South Upi Municipal Police Station pasakaan og kasong ngadto sa korte.