GIBAKWI ni Davao City Mayor Sara Duterte-Carpio ang iyang kandidatura isip mayor alang sa 2022 elections Martes sa hapon, Nobyembre 9, 2021.
Miabot si Duterte-Carpio sa buhatan sa Commission on Elections (Comelec) bandang alas 2 sa hapon.
Wala magpa-interbyu ang mayor sa mga tigbalita nga naghuwat sa gawas sa maong buhatan.
Apan sa pahayag nga gi-post sa iyang Facebook page, gikompirma niini nga misibog siya sa iyang kandidatura alang sa subling pagdagan sa pagka-mayor.
"Ngayong hapon wini-withdraw ko ang akong kandidatura sa pagka-Mayor ng Davao City. Si VM Baste ang papalit sa akin. Si Atty. Melchor Quitain [Jr.] ang nominado namin sa pagka-Bise Alkalde," pahayag niya.
Sayo niini, si Vice Mayor Sebastian Duterte misibog sab sa subling pagdagan sa pagka-bise mayor alang sa 2022 elections, ug nagpahulip kang Konsehal Melchor Quitain Jr.
Personal niyang gibakwi ang iyang certificate of candidacy (COC) Martes sa buntag, Nobyembre 9, didto sa buhatan sa Comelec sa Magsaysay Park.
Sa pahayag sa bise mayor, gikompirma niini ang iyang pagsibog.
"I have filed my withdrawal as vice mayor candidate of Davao City. I hereby nominate Atty. Melchor Quitain Jr. as my substitute," matud ni Duterte,
Dugang pa niya "I am deeply grateful to the Dabawenyos for the support they have given me all this time."
Ang maong katikaran mipasilaob sa tabi-tabi nga si Duterte-Carpio posibleng modagan alang sa mas taas nga posisyon, ilabi na nga ang paghulip sa mga kandidato gitugtan hangtud sa Nobyembre 15, Lunes.
Samang kahimtang nahitabo sa dihang iyang amahan, kanhi mayor sa siyudad sa Davao ug karon Presidente Rodrigo Duterte mihulip kang Martin Diño isip presidential candidate sa 2016 eleksiyon.
Sa uwahing katikaran, giingong nibalik ang bise mayor sa Comelec ug miduso sa iyang COC sa pagka-mayor sa siyudad sa Davao hulip kang Duterte-Carpio.