GUMIKAN sa kalantip sa hunahuna sa atong mga scientist ug ang paglambo sa siyensiya sa medisina, nadiskubre na gyud ang tambal batok sa gikalisangan nga Covid-19 nga mihamok sa tibuok kalibutan. Mao na kaha kini ang makapahunong sa pandemiya?
Ang Pfizer nianunsiyo niadtong miaging semana nga naka-develop na sila og tambal sa coronavirus disease 2019 (Covid-19). Kini base sa clinical trials nga ilang gipahigayon sa Estados Unidos.
Ug matod pa, ang maong tambal epektibo kaayo pang-alkontra sa Covid 19. Ikaduha kining tambal nga nadiskobre taas kaayo ang efficacy (kaayuhan).
Kon mogawas na kini sa merkado o mabaligya na for commercial purposes sa mga botika, pagatawgon kining maong medisina og Paxlovid. Kon motumar ang usa ka tawo niini human matakbuyan og Covid 19, maayo sulod lang sa lima ka adlaw. Dili magrabihan ug madala sa ospital. Layo sa piligro nga mamatay.
Matod pa sa Pfizer, dunay independent board of experts nga nag-monitor sa clinical trials sa Pfizer alang ning maong tambal mirekomendar nga ihunong na ang pagpahigayon og clinical trials gumikan kay ila nang nasuta ang kaapektibo niini.
Ang monitoring board daghan og nakita nga mga benepisyo ngadto sa mga pasyente nga motumar ning maong tambal.
Ang Pfizer nangayo na og pagtugot sa Food and Drug Administration (FDA) sa Estados Unidos sa pagbaligya ug paggamit ning maong tambal.
Si Annaliesa Anderson, usa sa mga opisyal sa Pfizer nga nangulo sa pag-develop ning maong tambal, niingon nga wala sila magtuo nga bisan sa ilang mga damgo nga ingon niini ka epektibo ang Paxlovid.
Misaad ang Pfizer nga mohatag usab og tambal sa mga pobreng mga nasud kon mogawas na kini sa merkado pinaagi sa United Nations (UN).
Samtang, ang Merck Company, ubos sa pagpakig-alayon sa Germany, mipagawas usab sa ilang drug development nga pang-alkontra usab sa Covid-19. Ang ilang tambal gitawag og Molnupiravir.
Hinaut nga kining maong mga medisina mao na gyud ang magpahunong sa gikalisangan nga Covid-19. Maayo kon madali kini. (bobbygnalzaro@gmail.com)