GIDASONAN sa Korte Suprema ang pagkonbikto sa usa ka bana nga napamatud-ang sad-an sa paglapas sa Republic Act (RA) No. 9262, ang Anti-Violence Against Women and Their Children Act of 2004, sa kaso nga XXX v. People (G.R. No. 241390, Jan. 13, 2021). Sanglit confidential ang mga kaso ubos sa RA 9262, dili ikabutyag ang mga pangalan sa nahilambigit sa maong kaso.
Gipalayas sa bana ang iyang asawa ug lima ka mga anak. Ug didto sa ilang “conjugal home,” iyang gikapuyo ang iyang kabit. Gikonbikto siya sa Regional Trial Court (RTC) Branch 71 sa Iba, Zambales ug gipahamtangan siya sa indeterminate penalty nga upat ka tuig, duha ka buwan ug usa ka adlaw sa prison correccional isip minimum ngadto sa walo ka tuig ug usa ka adlaw sa prison mayor isip maximum.
Gidasonan sa Court of Appeals (CA) ang desisyon sa RTC. Gipasaka niya kini sa Korte Suprema ug gidasonan sa Labawng Hukmanan ang desisyon sa CA. Apan gipun-an ang silot sa petitioner ug multa nga P100,000. Gimandoan usab siya nga moagi sa usa ka mandatory psychological counseling o psychiatric treatment ug sa pagtaho sa pagtuman niini sud sa 15 ka adlaw sa pagkahuman sa counseling o treatment.
Matod pa sa Korte Suprema, napamatud-an nga nakahimo ang bana sa psychological violence ubos sa RA 9262. Sumala sa asawa, sa ilang 23 ka tuig nga panagpuyo, ang petitioner magsigi og kahubog ug pamabaye. Sa Oktubre 2010, ang asawa ug ang petitioner nag-away ug gipalayas ang asawa ug ang lima ka mga anak.
Gikombinsir sa kamagwangang anak ang tulo niya ka igsuon nga mobalik sa ilang balay aron mapugos ang ilang amahan nga mosuportar kanila, ang ikalima didto sa ilang inahan. Pinaagi sa text messages, ang tulo ka mga anak nitaho sa ilang inahan nga sigig kahubog ang ilang amahan. Usa ka gabii niana, ang ilang amahan nipauli nga may kuyog nga usa ka babaye nga gipail-aila kanila nga ilang iyaan. Didto na kini puyo sa ilang balay. Kabit diay kadto sa ilang amahan.
Matod sa Labawng Hukmanan, napruybahan ang tanang elemento sa kalapasan sa Section 5(i), RA 9262. Kini sunod nga elemento sa krimen:
1) ang offended party usa ka babaye o iyang anak o mga anak; 2) ang babaye mahimong asawa sa kanhi asawa sa offender, o usa ka babaye nga adunay sexual or dating relationship kaniya, o babaye nga inahan sa iyang anak. Mahitungod sa anak sa babaye, mahimo kining legitimate or illegitimate, nagpuyo sa ilang family abode o wala;
3) ang offender nakahimo ngadto sa babaye o sa bata og mental or emotional anguish; ug 4) ang mental anguish nahimo tungod sa pagpakauwaw atubangan sa publiko, gibalik-balik nga verbal and emotional abuse, pagdumili sa financial support o custody sa mga menor de edad nga bata ug susamang mga pagkuwang. edbarrita@gmail.com