NINDOT paminawon kon ang mga namunoan sa usa ka passenger terminal mopasunod gyod sa lagda batok sa Covid-19 sama sa pagsul-ob og face mask, face shield ug social distancing.
Siyempre, kampante ang mga pasahero tungod sa gipakitang pagpakabana sa delikadong sakit.
Mas maayo nga maniguro kaysa mokompyansa lang, labi na kay daghan na ang namatay sa Covid-19.
Apan kon masobrahan ra pod ang patakaran sa maong passenger terminal, dili na pod tingali maayo.
Pananglit, adunay usa ka passenger terminal nga gilima lima lang ang pagpasulod sa maong terminal, lima ka pasahero lang pasudlon, matod pa, aron di magdasok sa sulod.
Kon tua na sa sulod sa terminal, dili mahimo nga mogamit sa cellphone para motawag o modawat sa tawag. Kon manawag gyod ang pasahero, pagawson usa sa terminal og adto na sa gawas motawag o modawat og tawag.
Kadtong gusto mosulod, maghulat usa sa gawas hangtod mosugot ang gwardiya nga mahimo na nga mosulod, lima-lima gihapon. Ang nahibilin sa gawas, maghulat nga magtindog kay wala may lingkoranan, buyno dunay pipila ka buok apan di kini paigo sa gidaghanon sa pasahero.
Sa dili pa pasudlon padung sa terminal, dunay ihatag nga papel para contact-tracing. Gawas pa niini, kinahanglan pa nga adunay QR pass, para contact-tracing gihapon. Ngano kaha nga kaduha man kuhaan para contact-tracing?
Inig gawas sa terminal padung na sa barko, magpila na pod kay lima-lima ra man gihapon ang pagpasulod sa barko. Adunay gwardiya nga nagbantay para social distancing kunohay.
Apan sa dihang gipangutana kon didto sa sulod sa barko, gipatuman ba gihapon ang social distancing, igo lang mokatawa o motan-aw pero di motubag.
Ang rason – nasayod sila nga wala na gipatuman ang social distancing sulod sa barko kay sinardinas na man didto.
Gusto lagi sa tag-iya sa barko nga modako ang kita mao nang bahala og magsinardinas. Parehas ni sa airport terminal, magsuroy-suroy ang mga gwardiya dala ang pahimangno sa pagsunod sa social distancing pero sa sulod sa eroplano, magsinardinas diay ang mga pasahero.
Kon ingon niini ang patakaran sa mobiyahe nga mga pasahero, mao sab kini ang patakaran sa barko kon padung na kini modunggo sa pantalan sa maong passenger terminal.
Moabot og usa ka oras usa mahuman ang pagpakanaog sa mga pasahero. Ingon ini kalisod. Sulay mo og bisita sa Tagbilaran sakay sa fastcraft.