UGA ang yuta, lawos nga mga tanum ang kahimtang sa mga suporter ni Mayor Sara Duterte-Carpio sa ilang pagkasagmuyo sa milabay nga mga adlaw diin siya nag-file sa ìyang Certificate of Candidacy (CoC), magpasubli pagka-mayor sa dakbayan sa Davao. "Dili ko modagan pagka-presidente sa nasud" maoy pamulong niya.
Nag-una si Mayor Sara sa tanan ng gipahigayon nga survey, apan nganong hinanali man dayon ang iyang pagsumite sa iyang CoC pagka-Mayor?
Niadtong Martes sa hapon, mibalik siya sa buhatan sa Commission on Elections (Comelec) sa dakbayan kay iyang bakwion ang iyang gilagdaan nga dokumento kay ang iyang manghod, si Vice Mayor Sebastian Baste Duterte, maoy mohulip sa posisyon nga iyang daganan.
Ang katikaran nakahatag og paglaum nga gikalipay sa daghan, nabanhaw ang paglaum nga modagan siya sa national position.
Unsa man nga posisyon ang iyang daganan ug sa unsa kaha nga paagi kay substitution naman lang ang nabilin nga panahon?
Magpabilin sa kasaysayan sa politika sa nasud ang nahitabo sa panahon ni Rodrigo Duterte sa iyang pagdagan ug nahimong presidente. Ang normal, karon giilisan sa new normal ug mao na kini karon.
Ang deadline sa pag-file sa mga kandidato dili pa mao ang pinal hangtud mahuman ang deadline sa substitusyon nga gilatid sa Comelec.
Sara Duterte-Carpio maoy pangalan nga ginakonsidera sa mga kaatbang nga usa ka pader nga lisud tumpagon karong umaabot nga eleksiyon 2022.
Ang mga lakang lisud basahon sa mga kalaban. Mao kana ang "Tatak Duterte" kay sa panahon nga wa ka nagdahom, kalit siya motunga!
Hangtud karong panahona, daghan ang nagadahom nga pagka- presidente ang daganan ni Mayor Sara.
Kinsa kaha ang mahimong sakripisyo kon matinuod ang panaghap sa pipila?
Namahayag na sab si Presidential aspirant Bongbong Marcos ug gipaila nga si Mayor Sara ang iyang ka-tandem nga bise presidente niya luyo sa mga pagprotesta aron paphaon siya sa listahan sa mga presidentiables.
Dili layo sa tinuod kon ang mga pulong ni Mayor Sara maoy basihan nga dili siya modagan pagka-presidente bisan sa singgit sa katawhan nga "Run, Sara,Run!"
Sa iyang pag-withdraw sa pagdagan sa pagka-Mayor sa dakbayan sa Davao, nisamot pagkakutaw ang eleksiyon, apan pila ka adlaw lang ang paabuton sa katawhan, motin-aw ug mohulpa ra ang mga bukal sa kawa ug atong makita ang tinuod nga hulagway sa mga pilianan sa moabot nga eleksiyon.
Mibalik og nakutaw man pag-usab ang kawa, gikalipay kini sa katawhan nga mahinamon nga magpaabot unsa man gyud ang mahimong lintunganay karong Nobyembre 15.
Usa ka ba sa nabuhian sa paglaum?