KIDAPAWAN CITY -- Mitahan sa mga awtoridad ang sinaligan nga lider sa Bangsamoro Islamic Freedom Fighters (BIFF-Karialan faction) alas 11:00 sa buntag, Martes, Nobyembre 9, sa Midsayap, probinsiya sa Cotabato.
Naila siya nga si alyas Kumander Omar, usa sa mga sinaligan ni Kumander Kagui Karialan sa BIFF-Karialan faction.
Sumala kang 602nd Brigade Commander Colonel Joven Gonzales nga si Omar misurender ngadto sa puwersa sa 34th Infantry Battalion, Philippine Army nga gipangulohan ni Lieutenant Colonel Edgardo Vilchez Jr., sa pakig-alayon sa lokal nga panggamhanan sa Midsayap ug Midsayap Municipal Police Station.
Dala sa pagsurender ni Omar ang usa ka 60 mm mortar ug usa ka kalibre .45 nga pistola.
Giubanan sab ni Kumander Abdullah Dhats, field commander sa 105th Battalion Company, Bangsamoro Islamic Armed Forces (BIAF) sa Moro Islamic Liberation Front si Omar sa iyang pagsurender.
Nakadawat si Omar og inisyal nga hinabang gikan sa LGU-Midsayap.
Samtang gidayeg ni 6th Infantry (Kampilan) Division Chief ug Joint Task Force Central Commander Major/General Juvymax Uy ang LGU-Midsayap, Midsayap Municipal Police Station, 34th IB, 602nd Brigade ug MILF sa malampusong pagsurender ni Omar.