PABILIN nga boluntaryo lang ang paggamit og face shields sa siyudad sa Davao bisan pa kon gikuwestiyon ni Presidential Spokesperson Harry Roque nga nagtawag niini "null and void."
Gisulti ni Roque atol sa press briefing niadtong Lunes, Nobyembre 8, nga ang Executive Order (EO) 51-A nga giisyu ni Mayor Sara Duterte-Carpio di pa moepekto kay ang nasudnong kagamhanan wala pa makahukom sa ilang palisiya sa nahisgutang personal protective equipment.
Ang EO 51-A nagkanayon, "Face shields shall be for voluntary use in the 3Cs settings: crowded places, close contact settings, and confined and enclosed spaces."
"For all other places, the use of the face shield shall not be required," matud sa EO.
Ang pahayag sa tigpamaba nahitabo human si Manila Mayor Isko Moreno mimugna sab og samang EO.
Gisulti sab niini nga hisgutan kini atol sa IATF meeting karong semanahona.
Samtang ang Department of Health (DOH) nag-awhag sab sa mga lokal nga ehekutibo nga maghuwat alang sa desisyon task force bahin sa kontrobersiyal nga palisiya.
Apan si Covid-19 Task Force spokesperson Dr. Michelle Schlosser nagkanayon sa paghinabi kaniya sa 87.5 FM Davao City Disaster Radio kagahapon, Miyerkules, Nobyembre 10, nga ang siyudad walay plano nga bakwion kini bisan pa sa pahayag ni Roque bag-ohay lang.
Hinuon, mibalibad si Schlosser nga mohatag sa iyang kaugalingong interpretasyon sa pahayag ni Roque.
Apan matud niya: "What we do in the city is we follow the executive order. I understand there is what we call the IATF national guidelines and memorandum circular. But since we are under the executive order of our mayor, we will be following the executive order, and we will implement what is written on that executive order."
Gitataw sa opisyal sa TF nga dunay "multi-factorial" nga hinungdan sa pag-isyu sa EO.
"The data is showing us na... naa na na gyud ta sa acceptable level of positivity rate, and then our roll out sa vaccine is taas-taas na pud," tin-aw ni Schlosser.
Sa pagkakaron, dugang niya nga maghuwat sila sa dugang katikaran bahin niini.
Hinuon si Interior Secretary Eduardo Año nagsulti nga ang giisyu nga EOs di makonsidera nga "null and void" tungod kay mga lokal nga ehekutibo ubos sa Local Government Code, mahimong makamugna sa ilang kaugalingong ordinansa ug EOs.
Di matud pa mopagawas og bisan unsang mando si Año aron nga pakgangon ang mga LGUs basta ang ilang mga lugar naa na sa "low risk" sa Covid-19.