DUL-AN sa tunga sa bilyon ka pesos nga balor sa illegal nga drugas nasakmit sa kapulisan sa siyudad sa Sugbo sulod sa usa ka tuig ug pito ka buwan sa 2,000 ka anti-drug operations, kadaghanan sa nadakpan bag-ong mga drug player.
Gipasigarbo sa Cebu City Police Office (CCPO) ang ilang kalampusan sa ilang kampanya batok kriminalidad ug illegal nga drugas taliwala sa pandemiya.
Sa gipakita nga data sa CCPO nakasakmit sila og dul-an 61 ka kilong shabu nga mobalor og P413,489,572 ug 11,400 ka punoan sa marijuana ang ilang naibot nga mo kantidad kini sa P4,767,168 atol sa kapin duha ka libo ka anti-drug operations.
Sa maong operasyon, nakasikop sila og 2,165 ka drug personalities ug nakapasaka og 4,405 ka kaso sa mga suspek.
Nakadakop og 4,639 ka mga sugarol atol sa 2,286 ka operations niini.
Nakaimbargo usab silag 442 ka mga armas nga walay lisensya ug 594 ang gitahan sa police stations sa 442 ka operations diin 421 usab ang ilang nadakpan ug napasakaan og kaso sa korte.
Nakadakop ang 11 ka police stations og 914 ka wanted persons nga adunay mga warrant of arrest ug 162 ka most wanted persons
Matod ni Police Lieutenant Colonel Wilbert Parilla, deputy city director for operations sa CCPO, dali nga madakpan ang drug pushers sa dakbayan atol sa pandemic tungod sa limitado lang ang lihok sa mga tawo.
Giangkon ni Parilla nga daghan silag nasakmit nga illegal nga drugas sanglit ang dakbayan sa Sugbo maoy gihimong transhipment ug bodega sa mga durugista sa kaulohan ug Mindanao sanglit naa sa tunga ang Sugbo.
Mando ni Police Colonel Josefino Ligan, hepe sa CCPO, hingusgan pa ang ilang kampanya batok sa illegal nga drugas ilabi na nga nagkaduol na usab ang kapaskohan nga gituohang mosaka ang supply niini.