15M nga mabakunahan target sa kagamhanan



TARGET sa nasudnong kagamhanan nga mabakunahan ang 15 ka milyon ka mga tawo atol sa tulo ka adlaw nga “National Vaccination Day,” nga ipahigayon gikan sa Nobyembre 29 hangtod Disyembre 1, 2021, matod ni National Task Force (NTF) chief implementer ug vaccine czar Carlito Galvez Jr. Martes, Nobyembre 29.

Sa iyang report atol sa Talk to the People Address ni Presidente Rodrigo Duterte nga gisibya saMiyerkules, Nobyembre 10, si Galvez niingon nga ilang target nga mabakunahan ang lima ka milyon ka mga indibidwal kada adlaw atol sa tulo ka adlaw nga kalihokan, nga dungan nga ipahigayon sa 16 ka rehiyon ug sa Bangsamoro Autonomous Region for Muslim Mindanao (Barmm).

Matod niya nga nangayo sila og executive order gikan ni Presidente Rodrigo Duterte nga ideklarar ang nahisgutang mga adlaw isip national holidays.

Gipakasama ni Galvez ang National Vaccination Days ngadto sa Election Day diin ang mga tawo moadto sa polling precincts aron mobotar. Hinuon, ning higayona, moadto sila sa “mga presinto” alang sa pagbakuna.

Si Duterte niingon nga ang national vaccination drive ipahigayon sa nahisgutang mga adlaw dungan sa Nobyembre 30 nga paghandum sa Bonifacio Day.

“With this, we want to convey the message that every Filipino who will get vaccine... Lahat na pala, ang gustong ipasabot dinhi sa gobyerno nga ‘yung tanang nagpabakuna are heroes, all you hero,” matod niya.

Atol sa National Vaccination Days, si Galvez niingon nga ang tanang rehistradong vaccination sites sa tibuok nasod i-activate ug palapdan sa mga ospital, eskwelahan, arena, gymnasium ug uban pang susamang pasilidad.

Matod niya nga ang mga pribadong sektor, apil ang mga fast food chain, nitanyag usab nga gamiton ang ilang mga pasilidad isip vaccination sites.

Matod ni Galvez nga nakig-alayon sila sa nagkalain-laing ahensya sa gobyerno, medical groups ug pribadong sektor alang sa pagpalihok sa ilang resources ug manpower aron makasalmot sa maong kalihukan.

Matod niya nga mopahigayon sila og training alang sa magsilbing vaccinators.

Giawhag ni Galvez ang mga local government unit (LGUs) nga mahimong mas mamugnaon sa paghimo og mga estratehiya sa pagpakusog sa mga operasyon sa pagbakuna ug pagdasig sa mas daghan nilang mga konstituwente nga magpabakuna.

Si Interior and Local Government Secretary Eduardo Año niingon nga importante usab nga maedukar sa mga LGU ang ilang katawhan sa mga benepisyo sa pagbakuna.

Giawhag usab niya ang mga LGU sa pag-andam sa ilang mga pasilidad nga katipigan aron malikayan ang pagkadaot sa mga bakuna.

Matod ni Galvez nga kabahin sa ilang pagpangandam alang sa National Vaccination Days mao ang inspeksyon ug assessment sa mga storage facility.(TPM sa SunStar Philippines)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph