ANG usa ka lugar o business establishment mahinungdanon kon nakahibawo ka nga naghatag kini og tabang ug kaayohan sa usa ka komunidad.
Sama niining Asturias Beach House nga nahimutang sa Barangay Owak sa Lungsod sa Asturias sa kasadpan sa Cebu.
Ang pagkaon nga isirbi sa restawran sa Asturias Beach House naggikan sa hinaguan sa mga mangingisda ug mga mag-uuma sa lungsod.
Pananglitan, ang Owak Fishermen’s Association (OFA) maoy mosangkap sa seafood ug sila pud ang mogiya o moalagad nimo kon maglingawlingaw ka sa kadagatan o sapa.
Matod ni John Carl Dupal-ag, ang 33 anyos nga barangay kapitan sa Owak ug nagdumala sa Asturias Beach House, dako og tabang ang OFA sa pagpadayon sa pagpadagan sa resort.
Uban kaniya, nagmugna ang OFA og mga aktibidades nga molingaw sa mga bisita sa resort.
Mao na nga ang Asturias Beach Resort daghang ikadalit sa ilahang guests sama sa floating cottage, trampoline (P30 for 10 minutes o P50 for 30 minutes) kayaking (P200 for 30 minutes o P350 for one hour), dolphin watching, snorkeling ug diving, ug marine tourism cruise.
Hapit tanan sa service crew sa resort nagpuyo sa Asturias o taga Asturias. Maayo ang serbisyo sa resort.
Ang room rates sa Asturias Beach Resort naa sa P1,500 (single), P1,700 (double o twin beds), ug P3,000 (barkada room good for six).
Mahimo ra nga magdala ka og imong kaugalingong pagkaon apan mo-charge ang resort og corkage nga P500.
Sa katong dili mokuha og rooms, adunay P50 entrance fee.
Bisan unsa pa nga food ang imong dad-on, order lang gyud sa halohalo ug bingkang dawa sa Asturias Beach Resort kay super lami ni.
Maayo gani nga mag-bring home ka og bingkang dawa aron makatabang ka sa Owak Vendors Association of Native Delicacies.
Nindot himuon nga venue ang Asturias Beach Resort para sa bonggang party--birthday, wedding, anniversary ug ubang special occasions.
Ang setup mo-level sa mga dagkong hotel sa Cebu City at half the price, matod pa.
Dili mahal, limpyo, daghang kalingawan, nagsubay sa Covid-19 health and safety protocol, ug adunay lamian nga halohalo ug bingkang dawa. Accredited pud sa Department of Tourism ang resort, meaning recommended sa DOT ang Asturias Beach House.
Kon maggikan ka sa Cebu City, ari agi sa Cebu Transcentral Highway kay mas dali nimo maabot ang Asturias Beach House. Molapas lang ka og gamay sa lungsod sa Balamban, naa na dayon ang resort.