Nalzaro: No vaccine, way ayuda, bonus, trabaho

311226
311226

MISUGOD na og pressure o pamugos ang kagamhanan, national ug local government, aron ang katawhan magpabakuna batok sa Covid 19. Hayan si Presidente Rodrigo Duterte mohangyo o momando sa private companies nga dili ipadawat ang mga aplikante nga dili bakunado.

Sukwahi na kini sa advisory sa Department of Labor and Employement (Dole) nga dili gamiton nga requirement ang vaccination sa pag-apply og trabaho. Hinuon, kadtong empliyado o nagtrabaho nang daan dili na mahilabtan.

Ang Department of the Interior and Local Government (DILG) mipalutaw sa ilang sugyot nga dili i-release ang ayuda sa kagamhanan ngadto sa mga benepisaryo sama sa Pantawid Pamilyang Pilipino Program kon dili bakunado. Gani posibleng wagtangon sila sa listahan. Adunay 4.2 million ka mga pamilya nga beneficiaries sa 4Ps.

Kon ibutang nga adunay lima ka mga miyembro sa matag pamilya, mokabat ngadto sa 20 milyones ka individual ang beneficiaries. Tiaw nimo na? Unya kapin pa sa usa ka milyon sa beneficiaries ang nabakunahan.

Puwerteng daghana sa dili makadawat sa ayuda kon ihinayon. Unya mga pobre pa. Apan gisupak kini sa pipila ka mga senador kay dili makatarunganon. Si Senador Panfilo ‘Ping’ Lacson, presidential aspirant, nagkanayon nga samtang gusto siya nga ang tanan mabakunahan, apan dili maayong gamiton kini nga rason nga dili ihatag ang ayuda.

Nagkinahanglan sila og ayuda gikan sa gobiyerno busa kinahanglan ihatag bisan di magpabakuna. Matod pang Lacson nga himuon nga ‘incentivized’ o pahalipay ang pagpabakuna, dili gamitong silot. May punto si Lacson. Nganong silutan ang katawhan gumikan lang kay nagdumili pagpabakuna? Hatagan og pahalipay o pribilihiyo ang mga magpabakuna aron madani ang uban.

Samtang si Cebu City acting Mayor Mike Rama mibahad nga dili i-release ang bonus sa mga empliyado sa City Hall kon dili mabakunahan ang tanan. Sa ato pa, pagan ang tanan bisan usa ra ka empliyado di bakunado. Mora mag sayop ning polisiya ni Mike. Morag iyang gisabong ang mga empliyado sa City Hall. Siyempre mangasuko ang mga bakunado sa dili mga bakunado. Nganong apilon man og silot ang mga bakunado na?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph