LUWAS nga na-rescue sa mga sakop sa Philippine Coast Guard (PCG) ang upat ka mga sakay sa naaberiya nga motorbanca sa lawod sa Hilantagaan island, lungsod sa Santa Fe, mga isla sa Bantayan, amihanang Sugbo.
Anaa na sa luwas nga kahimtang ang mga pasahero nga sila si Jbong Alvarez, 63; Tony Estocano, 53; Noel Gilbuena, 30; ug Joel Illustrisimo, 29.
Giingong nabuslot ang bahin sa motorbanca hinungdan nga daling nasudlan og tubig.
Dali hinuon nga mi-responde ang PCG kauban sa disaster team sa lungsod sakay sa A-4 motorbanca alang sa pagluwas as mga pasahero sa Nobiyembre 11, 2021.
Gidala ang mga pasahero sa Municipal Disaster Risk Reduction and Management Office (MDRRMO) sa lungsod alang sa dinaliang medical nga atensyon.