SELOS ang gilantaw sa mga awtoridad nga motibo sa pagpamusil sa pulis sa tulo ka mga tawo alas 4:30 sa kaadlawon Huwebes, Nobyembre 11, 2021, sa Koronadal City kon diin usa kanila napatay.
Giila ang namatay nga si Sanchie Canlas, taga Isulan, Sultan Kudarat samtang mga naangol sila si Joanna Saptula ug Debbie Biñas.
Samtang ang suspek mao si Patrolman Roland Lopez, nadestino sa 1st Mobile Force Company sa South Cotabato Provincial Police Office.
Sumala kang Koronadal City Officer-in-Charge Chief of Police Lieutenant Colonel Joedy Lito Guisinga nga nagkalalis sila Lopez ug ang iyang uyab nga si Saptula sa boarding house niini sa Pantua Village, Barangay Zone 3.
Tungod sa sobrang kasuko ni Lopez, gipamusil niya ang mga biktima gamit ang M16 Armalite rifle ug dayong miikyas sakay sa iyang motorsiklo.
Patay on spot si Canlas nga naigo sa ulo samtang sila Saptula ug Biñas nadala ngadto sa South Cotabato Provincial Hospital.
Gikanayon sa mga testigo nga naabtan mismo ni Lopez ang iyang uyab nga si Saptula uban ang ka-relasyon niini nga si Biñas ug mga barkada nga misampot sa lalis ug pagpamusil.
Padayon ang imbestigasyon sa Koronadal City Police Station samtang gitakdang pasakaan og kaso si Lopez sa salaod nga iyang nabuhat.