LUYO sa gipahugtan nga paghiling sa mga butang nga isulod sa Davao City Jail sa Maa, mokantidad sa P368,000 nga gituohang shabu ang gisulod sa kalabasa nga nakumpiska sa mga jailer Huwebes sa buntag, Nobiyembre 11, 2021.
Subay sa spot report sa Talomo Police Station, nagpahibalo kanila ang taga City Jail labot sa duha ka mga indibiduwal nga ilang nakustodiya human nakuhaan og mga pakite sa shabu.
Usa ka 48-anyos ang lalaki nga suspek samtang 26-anyos ang kauban niini nga babaye.
Una niini, gihiling sa mga jailer ang usa ka sako nga kalabasa nga gipasulod aron unta supply sa prisohan nga maoy sud-an sa mga piniriso.
Apan agi'g protocol, gihiling og maayo sa duha ka jailer ang mga kalabasa ug dunay usa nga daw dunay bangag.
Dihang ila kining gibuak, didto nakita ang mga pakite sa gituohang shabu dunay mga lighter.
Ang uban nga kalabasa duna sab sulod nga tabako, hinungdan nga gipangkustodiya ang duha ka nag-deliver.
Depensa nila, gipadala lang kanila ang mga kalabasa diin wa sila masayod unsa ang sulod niini.
Bisan pa man, giandam na ang kaso batok sa duruha didto sa korte.