NIHAWA na si Davao City Mayor Sara Duterte-Carpio sa Hugpong ng Pagbabago (HNP), ang rehiyonal nga partido nga uban niyang gimugna niadtong 2018, gikompirma sa opisyal sa partido Huwebes, Nobyembre 11, 2021.
Kini ang gitataw ni HNP Secretary General Anthony del Rosario sa text message ngadto sa SunStar Davao Huwebes.
Sa lahi nga text message, gikanayon ni Del Rosario nga ang mayor nagduso sa iyang resignation alas 9:30 sa buntag.
Sa iyang suwat ngadto sa mga opisyales ug miyembro sa HNP, si Duterte-Carpio nagkanayon, "It is with profound sadness that I hereby tender my resignation from our beloved party. My support will always be with you and I will always be grateful for all the things you have taught me."
"While we are saddened by her resignation, we however wish her all the best in her future plans. Godspeed po Mayor Sara. In our hearts, you will always be our Chairperson. We love you po," butyag ni Del Rosario.
Ang pagluwat ni Duterte-Carpio nahitabo pipila ka adlaw human siya mibakwi sa iyang kandidatura nga magpasubli sa pagka-mayor sa siyudad niadtong Martes sa hapon, Nobyembre 9. Gitudlo niya ang iyang igsuon nga si Vice Mayor Sebastian Duterte nga maoy mohulip kaniya.
Kini mipatumaw og mga espekulasyon nga modagan siya alang sa nasudnong posisyon.
Sa pagsuwat ning balita, si Duterte-Carpio wala pa mohimo og bisan unsang kompirmasyon sa iyang plano sa politika.
Pormal nga gilusad ang HNP niadtong 2019. Kini gimugna aron nga suportahan ang kagamhanan ni Presidente Rodrigo Duterte.
Niadtong Hulyo 2018, ang Commission on Elections (Comelec) mitugot sa accreditation sa HNP.
Dugang sa pagpahaum sa partido ngadto sa administrasyon ni Duterte, gisulti ni Duterte-Carpio nga iyang gimugna ang HNP "to pursue the ideals of what we all want, a strong region, a secure life for our constituents, good governance and effective leadership of the members of the party."
Ang partido nangampanya alang sa mga kandidato alang sa pagka-senador nga gi-endorso sa administrasyon ni Duterte niadtong 2019 Philippine Senatorial elections.