DAKONG bul-og sa baha ang nasinati sa molupyo sa Libungan ug Pigcawayan, North Cotabato alas 6:20 sa gabii niadtong Huwebes, Nobiyembre 12, 2021, hinungdan sa paghikling sa 125 ka mga pamilya.
Kini human nga miawas ang kasapaan gumikan sa pagtaas sa lebel sa tubig tungod sa kusog nga ulan, dala ang kusog nga hangin gikan kabukiran.
Nahadlok sab ang mga molupyo tungod sa dagkong mga liti gikan sa kawanangan.
Dali sab dayong milihok ang lokal nga panggamhanan sa Pigcawayan ug Libungan pinaagi sa ilang mga rescuers, lakip na mga sakop sa kapulisan ug kasundalohan ug sa Bureau Fire Protection ug mga force multipliers aron nga moabag sa pagluwas sa mga pamilya taliwala sa baha.
Gilunopan sab sa tubig ang national highway sa Barangay Batiocan, Libungan resulta sa pagkakulgot sa mga biyahero.
Kahinumdoman nga unang giigo sa baha ang mga lungsod sa Alamada, Kabacan ug Pikit nahisgutang probinsiya.
Temporaryong gipahiluna ang mga pamilyang bakwit kilid sa mga dalan ug tulunghaan gamit ang mga tulda samtang ang uban mitapon sa ilang mga paryente nga naa sa luwas nga mga dapit.
Nanghatag na og inisyal nga tabang ang kagamhanang probinsiyal sa Cotabato ngadto sa mga pamilyang naapektuhan sa baha.