DUGANG 353 ka mga Matinians ang nahatagan og ayuda nga tag P5,000 gikan sa buhatan ni Senator Christopher "Bong" Go nga gipahigayon niadtong Nobyembre 10, 2021, didto sa Mati Cultural Center sa Dakbayan sa Mati.
Ang maong panagtigum gitambungan mismo ni Mayor Michelle Nakpil Rabat, kauban sila Vice-Mayor Glenda Rabat-Gayta, City Councilors Eric Nakpil Rabat, Edwin Barrera, Arman Vallera, Delfin Miones, ug Kobe Capiña.
Mitambong usab ang representante ni Go nga si Ken Belmonte apil na ang mga personahe sa mga nagkadaiyang national ug lokal nga ahensya sa gobyerno sama nila Reynante Cruz, provincial operations officer sa Provincial Department of Social Welfare and Development-Davao Oriental; Mae Belle Fontillas, City Social Welfare and Development Officer sa City of Mati; Glenn Louie Banoy, labor employment pfficer sa Provincial Department of Labor and Employment; Slyia Ordiz, supervising specialists sa Department of Trade and Industry; Martina Chelsea Cruz, representate ni Provincial Director Lea Braga sa Technical Education and Skills Development Authority-Davao Oriental; ug mga beneficiaries sa maong programa.
Mipadayag sa iyang dakong pasalamat si Mayor Michelle kay Go gumikan wala gayud makalimtan sa senador ang mga Matinians.
Sumala usab ni Ken Belmonte, gitahasan ang tanan ahensya sa gobyerno nga sila na mismo ang mudoul sa mga tao.
Sa mensahe nga gipadayag ni Go, nanghinaot siya nga suportahan ang pagpakusog sa pagbakuna aron mahilayo ang tanan sa Covid-19 ug aron makabalik na kita sa normal.
Giawhag sab niya kadtong wa pa mabakunahan nga magpabakuna na aron makab-ot na natong tanan ang gipangandoy nga herd immunity.
Ang mga beneficiaries karong higayona nagagikan sa mga sektor sa fish vendors, kinhason vendors, laborers ug construction workers.
Niadtong Oktubre 12, 532 usab ka mga Matinians ang nakadawat og P5,000 nga ayuda gikan gihapon kang Go ug sa City of Mati.
Ang mga benepisyaryo gilangkuban sa mga mangingisda, mag-uuma, informal settlers, mga barbero, ug uban pang naapektuhan sa nagpadayong pandemya sa Covid-19 nga wala pa makadawat og ayuda gikan sa gobyerno. (PR)