LAB-AS pa sa iyang malampuson nga kampanya sa US Open Pool Championship sa Atlantic City, New Jersey niadtong September 19, 2021, si Filipino Carlo Biado milangkat na usab og laing titulo human niya dominaha ang Abu Dhabi Open 9-Ball Championship sa Power Break Billiard Hall sa Abu Dhabi kagahapon, Nobiyembre 12, 2021.
Gipilde ni Biado ang kababayang si Jordan Banares, 13-6, sa championship round aron sakmiton ang kampiyonato sa Abu Dhabi event nga nagtangag og dakong ganti.
Ang Filipino champion wala gyud nakatilaw og kapildihan sa tibuok torneyo. Lakip sa iyang gipangtipi mao sila si Harry Vergara (11-8) sa semifinals, Roland García (11-5) sa quarterfinals ug Venancio Tanio (11-4) sa Round of 16.
Iya usab nga gipangbiktima sila si Mohamad Eiljeffrey sa United Arab Emirates (9-0) ug laing Pinoy nga si Arnel Bautista (9-7) sa sayong rounds.
Si Banares, sa laing bahin, nakaipsot sa mga kamot ni Bautista (11-7) sa semifinals aron sakmiton ang katungod nga makigsangka ni Biado sa finals. Gawas sa championship trophy, si Biado miuli nga nakabulsa usab og 20,000 aed (United Arab Emirates dirham) samtang 10,000 aed isip runner up.
Mokabat ngadto sa 46,000 aed ang kinatibuk-ang ganti sa maong torneyo nga gisalmutan og 64 ka mga partisipante gikan sa nagkalainlaing nasod.
Si Biado, kinsa garbo sa San Juan, La Union, kon kahinumdoman maoy ikaduhang bilyaristang Pinoy nga midaog sa US Open.
Unang nakahimo sa ingon mao si Efren “Bata” Reyes, kinsa maoy nangharos niadtong 1994.
Si Fil-foreigner Alex Pagulayan midaog usab niini niadtong 2005 apan niadtong higayuna, nagrepresentar siya sa Canada.
“I’m very happy to win again, especially in an international tournament like this Abu Dhabi Open 9-Ball Championship. Maagang Pasko ito (Christmas came early!),” matod ni Biado, kinsa kanhi caddie sa Villamor Air Base golf course sa Pasay City, sa interbyu sa Spin.ph.