ALL work and no play makes life boring.’ Kini nga linya kanunay ipadungog-dungog niadtong magsigi lang og duko sa trabaho kada adlaw, non-stop unya way pahuway, usahay ma-abtan pa og kadlawon kay mag-overtime pa.
Tawag ini sa uban pinatyanay kay way pahuway hangtod mangapasmo o mangasakit.
Unsa may timailhan nga nagkinahanglan na og break o bakasyon?
Matod ni Cindy Lamothe sa basahon nga HealthLine kining mosunod maoy kumon nga simtomas kung na burn-out na sa trabaho:
Una ang pagka-saputon, iritabli ug dali na kaayong masuko. Di na gali maduol o masampit kay bisag gamay lang nga kasikas o komedya, padak-on na sama sa bulkan nga nag-umido sa sulod unya wa ka buto.
Subra na kaayo kung maghunahuna kon over thinking. Sensitibo na sa mga isyu bisag sa mga gagmay nga butang ug kalihukan. Padak-on dayon ang huna-huna bisag di angay huna-hunaon og lawom.
Masinati ini nga murag gipas-an ang tibuok kalibutan kay bug-at na ang abaga sa kadaghang gihunahuna.
Kanunay bation og kakapoy ug kahago ang lawas.
Ang uban mawad-an og gana sa pagkaon maong magluya, murag way kusog unya magsegi og kasakit.
Gawas ini mawad-an na sab og intiris sa mga naandang mga kalihukan o ginbuhaton.
Duna say uban nga masubrahan na ka sensitibo unya iyang paminaw siya pirmi ang gi-igo unya personalan na.
Ang uban sab mawad-an na og konsentrasyon, focus o direksyon. Ang uban magtungok, mag-inusara og mawad-an sa kalipay.
Duna say malimtanon na kaayo o disorganized na sa iyang trabaho.
Ang uban matahapon na sa iyang mga output sa trabaho unya daling ma-frustrate o bation og kapildihon sa iyang mga ginbuhaton o tahas.
Dunay uban nga di katulog kay ma-insomnia kay hasta sa iyang pag-uli sa balay, trabaho gihapon ang gihunahuna maong damanon o damguhon na og bati.
Kung kini masinati na gani, angay nang mag recess o mo break una sa trabaho unya magbakasyon aron ma re-fresh ang kaugalingon unya mabalik na sab ang gana ug kalagsik sa pagpanrabaho.