ANG Dakbayan sa Mandaue ug Dakbayan sa Talisay ninglibkas na sa pagpagamit sa publiko og face shields, gawas lang kon naa sa mga ospital, klinika ug ubang mga medical nga pasilidad.
Sila si Mandaue City Mayor Jonas Cortes ug Talisay City Mayor Gerald Anthony “Samsam” Gullas nangluwat og mga executive order alang niini.
Sa Nobiyembre 12, si Cortes niluwat sa iyang EO No. 27 nga nagtakda sa guidelines sa paggamit sa face shield.
Ang pagpasul-ob sa face shield anha lang sa mga ospital, medical clinics ug uban pang medical nga pasilidad diin kinahanglan kining isul-ob.
TALISAY PUD
Gilibkas usab ni Gullas ang pagpatuman sa mandatory nga pagsul-ob og face shield gawas lang sa mga lugar nga gikonsiderar nga risgo sa pagtakboy sa coronavirus disease (covid-19).
Base sa giluwatan nga kamandoan ni Gullas, nadesisyonan niya nga libkason na ang pagsul-ob sa face shield subay sa pagpaubos sa Alert level 2 ug ang padayon nga pagkunhod sa mga kaso sa Covid-19 sa syudad.
Sa uwahing datos sa kagamhanan sa Nobiyembre 10, aduna nala’y 31 ka mga kaso sa Covid-19 ang gi-monitor karon sa syudad.
Subay sa hangyo sa mga nagkadaiyang sektor sa syudad, nagtuo si Gullas nga angay na usab nga paluagan ang polisiya.
“The city government has received numerous requests and recommendations from different sectors to lift the requirement of wearing face shields within business establishments and enclosed places as face shields are useless and disputably preventive of the Covid-19 transmission but an extra financial burden, and inconvenient to use...” pagpasabot sa kamandoan ni Gullas.
Hinuon, mipasabot si Gullas nga gikinahanglan gihapon ang pagsul-ob og face shield sa mga lugar nga risgo sa pagtakboy sa sakit, sama sa hospitals, paanakan, medical clinic, skin clinic ug dental clinic ingon man diagnostic laboraties ug uban pang medical facilities.
Gihatagan usab og katungod ang mga pribadong opisina sa pag require og face shield kon gikinahanglan alang sa dugang proteksyon usab sa ilang mga empleyado.
Bisan paman niini, magpabilin ang kamandoan sa mayor labot sa pagsul-ob og facemask, pag patuman sa social distancing ug limitado nga kapasidad sa mga establisimento ug venues ubos lang sa gitugot.
Lakip na usab niini ang padayon nga pagpamakuna sa kinabag-an sa syudad aron makab-ot ang luwas nga palibot. (IRT, ANV)