TULO ka presidentiables gikatakdang mag-abot sa Cebu City karong adlawa, Nobiyembre 13, aron mahimong ninong ug ninang sa kasal sa anak ni Cebu City south district Rep. Rodrigo “Bebot” Abellanosa.
Kini ang gikompirmar mismo ni Abellanosa sa interview sa Superbalita Cebu sa Biyernes sa hapon, Nobiyembre 12.
Ang kaslon mao ang iyang kamaguwangan nga anak nga si Jose nga ang pangasaw-unon miyembro sa Iglesia Ni Cristo.
Ang gipasabot ni Abellanosa nga mga presidential aspirant mao sila si Vice President Leni Robredo, Senador Manny Pacquiao ug Manila Mayor Isko Moreno.
Ang tulo pulos magpapili sa pagka-presidente sa Mayo 2022.
Sa tulo, si Robredo maoy unang naabot sanglit kagahapon, Nobiyembre 12, duna na siyay mga kalihukang gitambungan uban sa iyang runningmate nga si kanhi senador Francis “Kiko” Pangilinan. Gihimamat sa duha ang ilang supporters.
Matod pa sa anak ni Abellanosa nga si Jose, sa miagi pa untang tuig ang ilang kasal ni Angelique Enriquez apan na-postpone gumikan sa pandemya.
Niadtong higayona, kusog pa kaayo ang tinakdanay sa coronavirus disease 2019 (Covid-19).
Ang Siyudad sa Sugbo ubos na Alert Level 2 tungod sa ubos na kaayong mga kaso sa Covid-19.
Butyag sa batan-ong Abellanosa nga sa miagi pang tuig giimbitar na ang nahisgutang mga very important person (VIP).
Niadtong higayuna wala niya damha nga silang tulo magpapili sa labing taas nga mga posisyon sa Pilipinas.
Si Jose maoy usa sa gikonsiderar nga magpapili unta pagka-konsehal sa south district ubos sa Bando Osmena Pundok Kauswagan (BOPK) apan wala nidayon.
Ang iyang igsuon nga si BG Abellanosa maoy nipuli ni south district congressional candidate Tomas Osmeña, kinsa niatras sa iyang kandidatura kagahapon, Nobyembre 11.
Ning pagsuwat, wa pa mahibaw-i kon di na ba modayon sa pagpapili ang kanhi mayor sa laing posisyon. Duna pa siyay hangtod sa Nobiyembre 15 sa pagpuli sa moatras nga kandidato sa ilang partido.