”Ninu man ing lulugud king salapi e ya kapilanman kumabsi; ninu man ing lulugud king pibandyan e ya kakabsi king keyang panakitan. Ini man alang kabaldugan.”
~ Talapanaral | Dangka 6: Sunis 10 (Ecclesiastes | 5:10)
“Idayu ing sarili yu king pamaglugud king salapi at magi kang makagyu king nung nanu ing atin ka, uling ngana ning Dyos, “E da ka lakwan kapilanman: e da ka paburen kapilan man.”
~ Ding Udyus | Dangka 13: Sunis 5 (Hebrews | 13:5)
“Kaybat ngana karela, “Mimingat! Maging mapagbante karing miyayaliwang uri ning kasakiman; ing bye e ya migaganap king kerakalan ding pibandyan.”
~ Lukas | Dangka 12: Sunis 15 (Luke | 12:15)
“Ating atlung pasbul palub king alang-anggang parusa—pamangaybugan, mwa at kasakiman. Balang masalese tau dapat da lang itsakwil deti, pauli ning paynturu la king pangababa ra kauryan ding kaladwa.
Ing taung atakasan na na la ring atlung pasbul a reti ning parusang alang-angga, O anak nang Kunti, darapat yang gawang makasaup king pamangilala king sarili inya sa’t ditak-ditak darasnan na ing kakataskatasang parasan.”
~ Dalit ning Kakataskatasang Panginwan | Dangka 16, Sunis 21-22
(The Song of God | 16:21-22)
***
Ken pa mung Biblya asna na karakal ing makasulat a panaral laban king kasakiman lalu na king labis a lugud da king salapi ring tau. Deng kaladwan o animals agyang tambakan mu lang limpak-limpak a salapi e do man pansingan. Mekad paglangutan da la dapot e do iyakmul uling ala lang nabangnan kareng papil a awsan tamung salapi uling e la sakim anti kareng aliwa kekatamung tau. Ing buri da mu reng kaladwan ya pin ing pamangan, ing makatudtud agyang nukarin o agyang makananu o mikatuknangan la mu, ing pamikasiping o ing pamanglwalu king sarili da o kauri da.
Ing tau ala yang sawa king salapi agya mang king pamangan tuknang yang mamangan nung mabsi ne o keng alak tuknang neng miminum nung malasing ne’t kasna ne dungus; tuknang n’ya naman king pamakisiping nung sinawa ne; tuknang neng matudtud nung sinawa n’ya namang matudtud uling mengaslak ne mata at deng mata na mengalbag no keng pamanudtud. Dapot keng pibandyan o king salapi e ya sasawa. Mengari yang talaga o balun a alang sikoti o lalam.
Mika-libu ya, buri na mika-apulu o mikadinalang-libu ya. Mika-dinalang libu ya, buri na laksa-laksa. Mika-laksa-laksa ya, buri na mika-kata-kata ya. Mika-kata-kata ya buri na mika libu o dinalang libung kata-kata ya at mekad pagnasan na pa ing mika-laksa-laksa yang kata-kata o salaping e na na abilang-bilang keng karakal.
Bakit? Kasi alang yang kebsyan keng makalabwad ing diwang kaladwa—itamu. Kasi ninu man kekatamu e malyaring tune kumabsi at ligayang lubusan at alang-angga king nanu mang bage keti king labwad. Malyari mu ita nung ing paulagan tamu ila pin ding makadiwang bage o spiritual matters o ding bage makasuglung king Apung Ginu lalung-lalu na ding Keyang Banal a Lagyu a alang pamiyaliwa Kaya.
Nung ing kasakiman talaga o balun a alang sikoti, ing lugud at pakalulu ning Ginu dagat a alang pampang. Kanita tamu magsantung.
***
Dake Talabaldugan:
mipabulad (pangdiwa) binulad, minulad e sasaryan at e binalak. English – speak up accidentally or unintentionally for whatever cause or reason. Alimbawa king pamangamit: “Agyang e ya mailig keng taltalan ing anak a Genar e na ayampat mipabulad keng darandaman nang kebusit na.”
mipabulaga (pangdiwa) binulaga, memulaga, mebigla e sasaryan at e binalak. English – made surprises or shocks accidentally or unintentionally for whatever cause or reason. Alimbawa king pamangamit: “Mipabulaga ya naman i Ating mali-mali inyang kilbit ne tundun keng gamat nang ibat tinalan yelu kaybat nang mebulagang minunang Patring.”
mipabulagta (pangdiwa) binulagta, mibulagtang e sasaryan at e binalak. English – fell on one’s back accidentally or unintentionally for whatever cause or reason Alimbawa king pamangamit: “Keng tula keng abalitan na king kabud na dintang a saken bangku a magdalang buntun-buntun a salapi mipabulagta ya keng gabun keng pangabigla na i Indang Metsang."
***
SADYANG GAWI at AMANU DA RENG KAPAMPANGAN
Ing gawi da reng kabalen keng pamanasan kanita ya pin ing pamaglambang. Gamit da salakab, swiki ampong asag o mekad sulu king tukil. Ing salakab gawa ya keng kwayan ampong kinayas a balat yantuk a yang gagamitan bang apitali-tali la reng kwayan a matilus keng punta a sasalaksak keng gabun o burak bang makulung la’t marakap deng asan keng salakab.
Kadakap ding asan daratuk da la keng swiki a pisala-salang kwayan at yantuk mu naman. Ing swiki atin yang bala asbuk a patilus bang karatuk ning asan e ne makalwal angga’t e ne palwal ning mekarakap. Dakal lang mipagyu keng salakab a asan. Mekad malyari da nong ulaman deng apulung katau keng metung a pibale-bale.
Ating aliwang gagamit pang salapang o tandus neng manyalakab la bang nung magitil ya mu keng salakab ing asan a maragul malyari neng salapangan o tandusan.
Ing asag yang gamit ding makiagyung sali kesa keng tukil mu a malyaring matdang agad nung mayangin at dagdag pa kaniti ing maslag nang sala.
King kasalungsungan malagad na la mu, nung atin pa, ring manyalakab. Metung na namang gawi iting makakalingwan bagya-bagya dapot bitasa.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.