ORMOC CITY - Nipahigayon sa iyang ikatulo nga State of the Municipality Address (Soma) si Kananga, Leyte Mayor Matt Torres niadtong Miyerkules, Nobiyembre 10.
Sa iyang Soma, gipalanog ni Torres ang iyang mga nabuhat ug mga plano sa iyang administrasyon.
Unang gihisgutan ni Torres ang kabahin sa imprastraktura hilabi na ang padayon nga pagtukod sa bag-ong municipal hall, health center nga dunay outpatient department (OPD) ug laboratory.
Lakip na ang bag-ong diversion road, pagpa-upgrade sa slaughterhouse, freedom park, merkado, riverwalk ug covered courts matag barangay.
“Ang plano dili lang kutob sa papel, kundi ato kining ipatuman,” matod sa mayor.
Gihisgutan usab sa mayor ang kabahin sa kahapsay ug kalinaw sa lungsod diin iyang gipasigarbo nga sa pipila lang niya ka buwan nga paglingkod, nadeklara nga drug-cleared ang lungsod.
Gipatuman ang surprise drug test sa elected ug appointed officials, mga kawani ug mga law enforcement personnel ug sila tanan negatibo sa drug test.
Lakip sa gihisgutan sa mayor ang pag-surrender sa kanhi mga sakop sa New People’s Army (NPA) pinaagi sa End Local Communist Armed Conflift Program (ELCAC) nga gipanghingusgan ni CongW. Lucy Torres-Gomez.
Gipadayag usab sa mayor ang kabahin sa emergency response sama sa pagtukod sa Covid-19 Task Force, pagtukod og evacuation centers, pagpalit og emergency vehicles, pagbutang og mga CCTV ug paghatag og hazzard pay ug allowance sa mga frontline personnel ug pagtabang sa mga empleyado nga nabiktima sa sunog.
Gipalanog usab sa mayor ang kabahin sa clean water, sanitation and environment.
Matod sa mayor, naa na sa 70 porsiyento nga kumpleto ang water filtration gallery.
Giimplementar na sab sa Kananga ang ‘no plastic’ matag Miyerkules.
Gihatagan sa mayor og pagtagad ang panglawas, sa pagsugod sa Covid-19, nakapalit ang Kananga og nga dekalidad nga PPE, scanners, UV lights ug vaccination roll-out.
Gipatuman usab sa mayor ang libreng check-up, dental care ug libreng mga tambal.
Giklaro sa mayor ang kabahin sa refund sa kuryente.
Matod ni Torres, gustuhon man niya nga mahatagan ang tanan nga mga kunsumidor, apan ang Department of Energy (DOE) mimando nga hunungon ang naandan nga paghatag sa refund kay wala kini mahisubay sa balaud.
Matod sa DOE, ubos sa balaud, dili mahimo mahatagan og refund ang nagkunsumo og lapas sa 100kwh.
Kabahin sa edukasyon, gisiguro sa mayor nga dunay nakatagana nga pundo alang sa operation ug maintenance sa mga pampublikong eskwelahan, pagpalit og kagamitan sama sa laptops, printers, pagtukod og dugang school buildings, pag-rubberized sa track oval ug pagbutang og LED lights.
Gipadayag usab sa mayor ang pagpalambo sa turismo ug negusyo sa lungsod.
Sa iyang panapos, gipaninguha sa mayor nga ubos sa iyang administrasyon, makuha na ang kuwang nga rekisito aron mahimo na nga siyudad ang lungsod sa Kananga.
“Mapasigarbuhon ug malipayon akong mopasabot kaninyo nga tanan natong mga proyekto ug fund utilization, tanan liquidated na, no overpricing, no corruption. COA has not issued any adverse findings. No COA red-flag! Meaning, we’ve maintained the integrity of all our government projects,” dugang sa mayor.
Ang Soma ni Torres gitambungan sa iyang kaubanan, mga kawani ug mga kawani sa national agency.
Nisaksi usab ang iyang mga ginikanan ug si Ormoc City Mayor Richard Gomez.