Moabot sa P6.9 milyones nga balor sa gidiling drugas ang nasakmit sa mga operatiba sa Regional Police Drug Enforcement Unit (RPDEU) 7 gikan sa usa ka person with disability (PWD).
Ang anti-illegal drug operation sa RPDEU 7 giimplimentar pasado alas dose sa kaadlawon sa Dominggo, Nobiyembre 14, nga niresulta sa pagkasakmit na sa kapin sa usa ka kilo nga shabu.
Si Police Lieutenant Bonifacio Tañola, team leader sa RPDEU 7, maoy nangulo sa ronda ubos sa pagsusi sa bag-ong pangulo sa ahensiya nga si Police Lieutenant Colonel Ronnie Failoga.
Si Failoga nga nahinabi sa SunStar Superbalita Cebu, niila sa nadakpan nga si Victoriano Moñuz, 31, molupyo sa Sityo C. Padilla, Barangay Duljo Fatima, Siyudad sa Sugbo.
Atol sa anti-illegal drugs operation, si Moñuz nasakmitan kini og shabu nga moabot sa usa ka kilo ug 20 gramos.
Subay sa street drug price value, mokantidad sa P6.9 milyones ang balor sa nasakmit nga shabu.
Si Failoga miingon nga ang ilang nadakpan bisan paman sa iyang pagkabaldado apan nahimo gihapon niining makahatag sa mga parokyano sulod sa Metro Cebu.
Dugang niini nga si Moñuz miangkon usab ngadto kang Failoga nga usa ka alyas “Oni” ang iyang agawon nga maoy tighatag niini og supply pinaagi sa iyang mga tawo.
Gikonsidera usab sa Regional Intelligence Division (RID) 7 nga si Moñuz nalakip sa regional high value target tungod sa iyang mga transaksyon nga sa tibuok Metro Cebu ang mga hagbungan niini.
Si Moñuz sa iyang depensa mibutyag nga karon pa kini nahatdan og dinaghan nga mga shabu apan kaniadto ginagmay lang.