Maayong pilion sa mga Sugbuanong botante ang lider nga dunay prinsipyo ug makahukom sa kaugalingon o dili madektahan.
Mao kini ang sentro sa mensahe sa pakigpulong ni Davao del Norte Gov. Edwin Hubahib, secretary general sa Partido Reporma, ang partido nga gipangulohan ni Sen. Panfilo Lacson, kinsa usa sa mga kandidato sa pagka presidente sa ikaduhang pagsuway sukad sa 2004.
Si Hubahib nagkanayon nga kinahanglan nga maghunahuna pag-ayo sa pilion nga labing taas nga pwesto sa kagamhanan sa nasod ug motan-aw sa kalidad sa pagtabang sa nasod ning nagpadayong pandemiya.
“Ang kinahanglan nato nga lider para sa tuig 2022 adunay kaisog, taas nga kahibalo, adunay kasingkasing nga mobati sa kalisod sa katawhan, lider nga adunay insaktong panghunahuna para sa pagbangon sa atong ekonomiya ug lider nga walay bahid sa korapsyon,” matod ni Hubahib.
Si Lacson, kanhi police chief, nagpapili sa pagka presidente uban ni vice-presidential aspirant Senate President Vicente “Tito” Sotto III.
Si Sotto maoy chairman sa Nationalist People’s Coalition, partido nga gitukod ni Eduardo Cojuangco Jr., usa ka crony ni anhing Presidente Ferdinand Marcos.
Ang Partido Reporma (official full name: Partido sa Demokratikong Reporma) gitukod ni Renato de Villa. Ang chairman karon sa Partido Reporma mao si Pantaleon Alvarez, kanhi kaalyado ni Presidente Rodrigo Duterte.
Si Hubahib niila sa kaimportante sa Sugbo para nila ni Sotto ug Lacson.
Dunay kaliwat si Sotto sa Sugbo. Apo siya ni Don Vicente Sotto, usa ka karaang magbabalaud nga kampiyon sa daghang kawsa, lakip sa freedom of the press.
Sa iyang bahin, si Lacson nahimong kumander sa Cebu Metropolitan District Command (Metrodiscom) gikan sa 1989 ngadto sa 1992.
“Ang ilang kasingkasing naa na diri sa Sugbo. Nakaserbisyo na sila ug gipakita na nila kon unsa ang ilang paghigugma sa katawhan sa Sugbo,” matod ni Hubahib sa interview sa mga reporter sa campaign headquarters ni Lacson ug Senate Sotto III sa A.S. Fortuna Street sa Mandaue City kagahapon, Nobiyembre 14, 2021.
Usa ka motorkada ang gihimo sa mga dumadapig sa Lacson-Sotto tandem nga nagsugod sa Mandaue City ug nitapos sa Barangay Basak, Lapu-Lapu City.
Sumala sa organizers, dul-an sa 600 ka motorsiklo ug ubang sakyanan ang ningsalmot sa motorkada.
Sa samang adlaw, ang mga dumadapig nila ni presidential aspirants Francisco “Isko Moreno” Domagoso ug Ferdinand “Bongbong” Marcos Jr., ninghimo usab sa ilang managlahing motorkada kagahapon. (IRT)