KAGAHAPON, November 15, ang katapusan nga adlaw sa mga kandidato nga mag-ilis-puli o di ba moatras sa ilang kandidatora. Sa akong pagsulat ning akong lindog, wa pay taho kinsa ang nangatras o gipulihan apan ato na nga nahibaw-an sa miaging' mga adlaw nga si Sen. Bato dela Rosa gibakwi na ang iyang kandidatora pagka presidente kay sa akong pangagpas wa man modayon og dagan pagka presidente si Davao City Mayor Sara Duterte-Carpio.
Gibakwi usab ni Sen. Bong Go ang iyang certificate of candidacy (COC) pagka bise presidente ug miduso og COC nga kandidato pagka president ubos sa PDP-Laban ug si Presidente Rodrigo Duterte ang iyang kandidato pagka bise presidente. Di ba gabalita man nga modagan pagka senador si Presidente Digong?
Nausab diay ang iyang desisyon. Sa ato pa, mag-atbang diay sila sa iyang anak kay si Mayor Sara miduso man sa iyang CoC pagka bise presidente. Wa kaha ta gilibog ra ani?
Si Mayor Sara miduso sa iyang kandidatora pagka bise presidente ubos sa partido Lakas-CMD, ang partido ni kanhi President Gloria Arroyo. Gibiyaan sa mayor ang iyang gimugna nga partido, Hugpong ng Pagbabago (HnP), usa siya mihurar sa Lakas-CMD. Gisagop si Mayor Sara ni Bongbong Marcos (BBM), nga iyang kandidato pagka bise presidente tungod kay di sila kauban og partido.
Unya, unsa kahay mahitabo sa mga kandidato ug lokal nga mga opisyales sa Mindanao nga magpasubli og dagan ubos sa HnP ni Mayor Sara, nga dako kaayo ang ilang pagtuo nga modagan pagka presidente ang ilang idolo? Mosuporta ba gihapon sila ni Sara, nga kandidato pagka bise presidente, nga walay presidente?
Dunay storya nga akong nabasahan nga si Mayor Sara unta ang modagan pagka presidente unya si BBM ang bise presidente. Apan si BBM, matud pa sa storya, wala mobutho sa ilang sabot nga mag-abot didto sa dapit ni kanhi Presidente Arroyo ug walay nahimo si Mayor Sara. Dakong kahiubos (kasuko?) ang gibati ni Presidente Digong nga modagan pagka bise si Mayor Sara tungod kay sa survey mas taas siya ni BBM.
Ang balita sa SunStar Cebu kagahapon usa ka pangutana. Mahitabo ba nga mag-atbang sila ni Presidente Digong ug iyang iha unika nga si Sara? Sa akong tan-aw dili kay si Presidente Digong mopadayon og dagan pagka senador kay kon modaug siya dako og purohan nga mapili unya nga Senate President ug magkita unya sila sa iyang "amigo" nga si Senador Dick Gordon. Kana kon modaug si Gordon.
Wala man mohatag og reaksyon si Mayor Sara, nga gisagop siya ni BBM nga iyang kandidato pagka bise presidente. Mangutana ta. Mayor Inday Sara kinsa man gyud ang imong dalhon nga kandidato pagka presidente, si BBM o Bong Go? Di ba kaha si Sen. Manny Pacquiao kay nakigmeting man si Presidente sa miaging semana?
Sa lain bahin, duna bay purohan nga ang presidente ug bise presidente sa sunod tuig homan sa piliay sa Mayo 9, 2022 pulos mga babaye? Posible o dili, apan kining klase sa atong pulitika karon sa eningles pa "nothing is impossible."