TACURONG CITY -- Angol ang mag-inahan human matumbahi og punoan sa lubi ang ilang balay alas 4:00 sa hapon, Dominggo, Nobyembre 14.
Giila ang mga biktima nga sila Lyn Lamigo ug ang siyam ka adlaw pa niyang anak, molupyo sa Purok Isemti, Barangay Romualdez, President Quirino, Sultan Kudarat.
Sa taho gikan sa Municipal Disaster Risk Reduction and Management Offie (MDRRM-President Quirino), nasayran nga kalit lang mihuyop ang makusog nga hangin sa dapit nga gipuy-an sa mga biktima ug natumba ang punoan sa lubi.
Abtik nga nagresponde ang mga silingan ug kabanay sa mga biktima diin gidala dayon nila kini sa balay tambalanan.
Hinuon, luwas na ang masuso ug iyang inahan nga igo lamang nakaangkon og bun-og sa ilang kalawasan.
Nagpasidaan ang MDRRM-President Quirino sa mga molupyo nga mag-amping ilabina karong panahon sa ting-ulan nga sagad ubanan sa kusog nga hangin nga maoy hinungdan sa pagpangatumba sa mga punoan sa kahoy.