MATANAO, Davao del Sur -- Blangko pa karon ang kapulisan sa Matanao Municipal Police Station sa matudlo nga mga responsable sa pagpusil-patay sa usa ka encoder nga babaye.
Ang insidente nahitabo niadtong Sabado sa gabii didto sa Purok Sampaguita, Barangay Poblacion, Matanao.
Giila sa kapulisan ang biktima nga si Dorothy Bantilan, usa ka encoder sa Rural Health unit.
Sa report sa Matanao Police samtang anaa gawas sa usa ka tindahan ang biktima uban sa iyang mga kabanay, kalit kining gipusil sa mamumuno nga nakasakay sa motorsiklo.
Dali sab nga misibat ang mamumuno sakay sa motorsiklo nga naghulat sa unahan sa tindahan samtang nahagba ang biktima.
Nakahiagom og samad pinusilan sa ulo ug liog ang biktima nga maoy hinungdan sa iyang hinanaling kamatayon.
Sa kasamtangan, gina-imbestigahan sa kapulisan ang motibo sa krimen aron maila ug masikop ang mga responsable.