GILAUMAN nga malipayon gayod ang pagsaulog sa Pasko ug Bag-ong Tuig sa mga Dabawenyo human nga miubos na pag-ayo ang kaso sa Covid-19 sa siyudad.
Sumala ni Davao City Mayor Sara Duterte-Carpio nga tungod sa padayong pag-ubos sa kaso sa Covid-19 sa dakbayan ug ang paspas nga paglambo sa alert level status sa siyudad, mamahimong magsaulog ang mga Dabawenyo nga bibo ug malipayon karong umaabot nga Pasko ug Bag-ong Tuig.
"Sundon nato ang Alert Level 2, everyone deserves that human sa kahago for one (1) year and four (4) months because of the pandemic...," ingon ni Duterte-Carpio atol sa regular nga radio program niini sa dcDR Lunes, Nobyembre 15.
Gitin-aw sab sa mayor nga wala pa'y pagaablihan ang City Government nga mga leisure events o unsa mang mga aktibidad nga magtapok ang mga tawo.
Giingon sab niini nga ang private lang ang tugutan, hinungdan nga virtual gihapon ang pagsaulog sa Pasko Fiesta sa sunod bulan.
Sa advisory nga gipagula sa Department of Health (DOH) Davao Region Lunes, anaa sa Alert Level 2 ang Davao City nga nahisakop sa daghang mga lugar sa Pilipinas nga anaa ang paspas nga pag-ubos sa kaso sa Covid-19.
Subay sab sa Regional Situation Update sa Davao Region gikan Nobyembre 14, 2021 alas 5 sa hapon, ang DOH Davao Center for Health Development nakatala lamang og 35 ka mga new cases sa Covid-19 nga magdala sa ihap sa kinatibuk-an sa rehiyon nga 1,780 total number sa mga active cases.
Sa 35 ka new cases, Nob. 14, ang 11 niini gikan sa Davao City, 11 gikan sa Davao de Oro, 11 gikan sa Davao del Norte, usa ka kaso sa Davao del Sur, ug usa ka kaso sa Davao Oriental.