Gikan sa lima, mahimong three-cornered fight na lang ang pagka gobernador sa lalawigan sa Sugbo sa umaabot nga Mayo 2022 nga eleksyon.
Kini human nga mi-withdraw sa ilang kandidatura ang duha ka mga kandidato pagka gobernador sa Nobiyembre 15, uwahing adlaw sa withdrawal ug substitution sa Commission on Elections (Comelec) Cebu Province.
Unang mibakwi sa iyang kandidatura si Pablo Olmedo, usa ka pastor sa Evangelical Free Church, subay sa desisyon sa ilang labaw nga ang pulitika dili angay sa mga pastor.
“As a pastor we should not be in politics. We are to serve the church, share the word of God and pray for the candidates,” matod ni Olmedo sa Nobiyembre 15, 2021.
Nibakwi usab sa uwahing minuto si Martin Mari Lozada, sa iyang kandidatura isip gobernador ubos sa Abag-Promdi.
Matod ni Lozada nga nahiusahan sa partido nga di na modayon sa iyang kandidatura.
Sa samang adlaw, gihuwat usab sa mga tigbalita ang gikatahong pag duso sa kandidatura isip substitution sa pagka gobernador ni Geraldin Yapha, kanhi Pinamungajan mayor.
Apan, nitik-op na lang ang alas 5:00 sa hapon ang withdrawal ug substitution sa Comelec apan walay kandidato nga nipatim-aw sa buhatan.
Gipasabot ni Atty. Lionel Castillano, election supervisor sa Cebu Province nga kon wa nay nabutang nga ngan as substitute, wa nay mapuli pa.
“Naa sa paragraph 3 nga that my substitute would be butangan na og ngalan ana. That would be our basis later on hangtod alas 5:00 kon naay mo-file as substitute sa ni-withdraw. So, kon wala unya gibutang man kay not applicable or N/A, it means nga ang Abag-Promdi wala nay gubernatorial candidate,”matod ni Castillano sa Nobiyembre 15.
Base sa listahan sa Comelec, tulo na lang ka mga ngalan ang mga kandidato pagka gobernador sa lalawigan.
Sila mao si incumbent Cebu Governor Gwendolyn Garcia, former Tourism secretary Ace Durano ug independent candidate nga si Nito Magnanao.
Gawas sa gubernatorial post, duna usa’y mi-withdraw ug mi substitute sa pagka board member nga mao sila si Romeo Jimenez Jr. sa tersero distrito apan gi-hulipan ni Jepthah Yapha, usa ka registered nurse ug konsehal sa lungsod sa Pinamungajan.
Nibakwi usab sa iyang kandidatura pagka board member sa teresro distrito si Emmanuel Birao ug gihulipan ni Gayle Opsima-Birao.
Alang sa mayoral post, nibakwi na sa iyang kandidatura si incumbent Naga City Mayor Kristine Vanessa Chiong ug nihulip kaniya ug magpapili pag-usab isip mayor sa syudad nga si former city mayor Valdemar Chiong.
Sa pagkutlo ning balita, wala pa’y giluwat nga pamahayag ang mayor sa rason sa iyang pag withdraw.
Subay niini, gi-pahibaw usab sa Comelec nga kutob Disyembre 15, 2021 na lang ang pag withdraw sa mga kandidatura, apan wa nay substitution.