Lineman namatay human nakuryentihan samtang nag-ayo sa linya sa koneksyon sa internet sa usa ka telecommunications company alas 4 sa hapon sa Dominggo atubangan sa RGT Gasoline Station sa Brgy. Poblacion, lungsod sa Oslob.
Ang biktima giilang si Jericho Amodia, 18, ulitawo, nagpuyo sa Sto. Niño de Nonoc, Tabunok, dakbayan sa Talisay, lumad nga taga Tabango, Leyte, kawani sa Insystic corporation isip lineman.
Sa imbestigasyon nila ni Police Master Sgt. Julius Caesar Parages, si Amodia nakuryentihan samtang nagta-od sa PLDT internet.
Samtang siya nagpatong sa hagdanan, iyang nakuptan ang ground wire sa Ceceo hinungdan nga siya nakuryentihan.
Sa pag-abot sa mga pulis ug mga rescuer sa Bureau of Fire Protection (BFP) nagbitay pa si Amodia sa mga wiring nga walay panimuot.
Gikinahanglan siyang ikanaug sa mga rescuer aron madala sa tambalanan.
Gidali siya sa pagdala sa tambalanan sa lungsud sa Oslob, patay na siyang niabot tungod sa grabeng paso nga iyang naangkon.