Kapin sa P13 milyones nga balor sa illegal nga drugas ang nasakmit sa Police Regional Office 7 (PRO) 7 sulod sa 24 oras nga Synchronized Enhanced Managing Police Operations (SEMPO) sa upat ka provincial police offices ug mga city police office sa Central Visayas.
Nag sugod ang dungan nga operation sa alas 12 sa kaadlawon sa Nobiyembre 13, 2021. Natapos kini pagka alas 11:59 sa tungang gabii sa Nobiyembre 13, 2021.
Nasakmit sa mga operatiba ang dul-an duha ka kilo sa gituohang shabu nga mobalor ang tanan og P13,367,136.
Nakasikop usab silag 150 ka drug personalities nga nalakip sa high value individual (HVI) sa 128 ka anti drug operations.
Samtang nakadakop usab ang kapulisan og 296 ka mga sugarol sa 122 ka anti illegal gambling operations diin nakasakmit silag P28,460 isip bet money.
Samtang sa loose firearms, nakaimbargo silag 223 ka mga armas nga way lisensya, ang uban niini gitahan, 23 usab ang nadakpan sa ilegal nga paghupot.
Mokabat usab sa 27 ka wanted persons ang ilang nadakpan samtang 183 usab ka mga tawo nga adunay warrants of arrest sa nagka lain-laing kaso ang ilang nasikop.
Nunot niini, gidayeg ni Police Brigadier General Roque Eduardo Dela Peña Vega ang kapulisan tungod sa malampuson nga Sempo nga way naangol o nakalas sa operations.
“Ang kapulisan sa Central Visayas ay nagpapasalamat sa partisipasyon at aktibong pagbibigay impormasyon ng komyunidad upang masugpo ang ilegal na gawain ng mga kriminal. Dahil sa inyo, successful ang ating katatapos lang na Sempo,” matod ni Vega.
Sa dul-an duha ka kilo nga nasakmit, ang labing daghan nga nakuha ang Cebu City Police Office (CCPO) nga gisundan sa Cebu Police Provincial Office.
Matod ni Police Colonel Josefino Ligan, hepe sa kapulisan sa dakbayan sa Sugbo, nga sulod lang sa 15 ka adlaw nakasakmit na silag 2,900 gramos sa gituohang shabu.
Matag buwan ang ilang target makasakmit silag tulo ka kilo sa ilang sub-sub nga kampanya batok sa illegal nga drugas apan karon pa lang hapit na nila kini makuha.
Gidugang ni Ligan nga ilang gihingusgan ang kampanya batok sa illegal nga drugas nunot sa pag loag na sa quarantine restrictions ug ang nagsingabot nga holiday season.