NI-FILE na sa iyang kandidatora pagka-bise gobernador si Davao de Oro Governor Jayvee Tyron Uy nga ka–tandem sa iyang amahan nga si kanhi gobernador ug karon Senior Board Member Arturo "Chongkee" Uy nga nagpapili sab pagka-gobernador.
Gipili sa anak ang ubos nga posisyon nga mao ang pagka-bise gobernador sanglit maoy iyang gitinguha nga matabangan ang tanan ug mapalig-on ang grupo nga iyang gialagaran nga mao ang Hugpong Ng Pagbabago (HNP).
Sa pagpanerbisyo, wa na'y angay'ng pamatud-an ang batan-ong gobernador sanglit sa iyang pagpangalagad sulod sa lima ngadto sa unom ka tuig isip amahan sa probinsiya, dako ang nahimong kausaban human gipadayon ug mas gipakusgan ang nasugdang kalamboan sa amahan.
Ang probinsiya nga sa sinugdan sakop pa lamang sa Davao del Norte nga nabahin ug nahimong usa ka probinsiya nga gitawag og Compostela Valley, karon nahimo nang usa ka malambuong probinsiya.
Nailhan og samot bisan sa mga lagyong dapit labi na dihang gipaningkamotan sa batan-ong gobernador ilawom sa iyang pagdumala nga mausab ang pangalang Compostela Valley ug nahimong Davao De Oro.
Dako ang kompiyansa si Gov. Tyron Uy nga sa pagbalik sa iyang amahan isip gobernador ning probinsiya ug maoy iyang katambayayong sa pagpanerbisyo sa katawhan, mas mosamot pa nga molambo kini labi na nga kauban sa ilang pagpangalagad sila kanhi governor Jose Caballero nga nagpapili pagka-congressman sa ikaduhang distrito ug Vice Gov. Maricar Zamora nga nagpapili sab pagka-congresswoman sa unang distrito.
"Posisyon is not everything, title lang nang posisyon," suma pa ni Gov. Uy.
Sanglit alang sa batan-ong gobernador nga kung manerbisyo, bisan unsang posisyon, maskin naa sa ubos, sa pinakagamay nga posisyon sa pagpangalagad, wala'y problema. Ang importante sumala pa nga makaserbisyo sa katawhan sa kinasing-kasing ug tinud-anay. (PR)